PUTRAJAYA, 5 Dis: Kabinet menteri Perintah Penyerakup sehari tu bela setuju gaji sida diputung sepenyampau 20 peratus ninting bulan, ku Menteri Besai Datuk Seri Anwar Ibrahim.
Iya madah pemutus nya digaga bekau ari penyiru raban menteri beratika penanggul ke ditapi rayat jam ke diatu.
Anwar madah, atur mutung gaji nya deka dipejalaika perintah nyentuk ekonomi menua pulai manah baka selama.
“Enti ekonomi suman (dalam timpuh) tiga taun, kitai pansik baruh mih…putung gaji tu sigi enda patut, tang aku beterima kasih laban sida setuju (Kabinet Menteri) pedis mimit.
“Bisi orang nyebut Anwar patut iya enda ngambi gaji Menteri Besai laban iya terima gaji Menteri Pekara Wang, enda betul… gaji tu siti aja,” ku iya ba aum pemberita pengudah betuaika aum khas keterubah Kabinet Perintah Penyerakup ditu, Hari Satu. – TVS
