KUCHING, 4 Dis: Sepenyampau RM10 juta belanja udah dikemendar dikena ngemanah dua jalai batang ba sitak Kunsil Nengeri (DUN) Mulu enggau Telang Usan di Miri.
Sapit Premier Sarawak, Datuk Amar Douglas Uggah Embas madah, dua bengkah sitak nya bela nerima agih RM5 juta lalu pengawa ngemanah nya diatu benung ranchak dipejalai.
Ku iya, projek ngemanah keterubah iya nya ngaul Jalai Long San ke Long Bangga enggau Pa ‘Dalih ke Jalai Bario.
“Urung 2,000 ruang bilik ari 250 buah rumah panjai ke ngenthak ngachir ba sepemanjai jalai ti ngembuan pemanjai 144 kilometer nya,” ku iya pengudah ninga licha senentang pengerembai sekeda projek ti dikemendarka ba dua kandang menua nya lebuh Hari Enam.
Uggah ke mega Menteri Infrastrakcha enggau Pemansang penyangkai Kapal madah, sebedau tu jalai nya semina diseruri kompeni batang (semina ngaul kandang endur ke bisi aktiviti nebang kayu).
Taja pia, iya nerang, nadai pengawa ngemanah dipejalaika kenyau ari bulan Julai 2021 pengudah kompeni nya nadai agi gawa ba endur nya.
Entudika nya, bekaul enggau projek ti kedua, Uggah madah, projek nya ngaul jalai pemanjai 32 kilometer ari Long Atip ke Long Terawan di Pelilih Telang Usan, semak Taman Negara Mulu.
“Gaya jalai ba dia rusak, bisi lubang sereta enda rata.
“Jalai nya enda dikemanah pengudah kompeni batang badu agi gawa ba endur nya kira-kira 10 taun ke udah,” tandu iya.
Berindik ari nya, ku iya, opis menteri udah baum senentang jematan besi baru meraka Sungai Tutoh di Baram, enggau projek nya dipelaba tembu bulan Mac taun baru.
“Pengawa ngaga jematan nya tejanggal ketegal gaya hari ke enda manah sereta fenomena ai pasang besai,” ku iya.
Licha ke diberi Injinir Opis Kereja Raya (JKR) Bagi Menua Miri Stephen Ung Neng Hui nya mega digulu Kaban Kunsil Nengeri (ADUN) Mulu Datuk Gerawat Gala, ADUN Telang Usang Dennis Ngau sereta Senator Datu Dr Nuing Jeluing. – TVS
