MIRI, 4 Dis: Kes COVID-19 dipelaba deka terus nambah nyentuk taun 2023 laban igi penyakit tu udah ngerekai ari purih Alpha, Beta, Delta nyentuk igi penyakit ke pemadu baru.
Taja pia, raban opis pengerai enggau perubat nangi bekaul enggau penyampau kes ke diterima ninting hari, sida diatu nadai agi irau ari sukut perubat silik laban tikas pengerai rayat agi ulih jaga, mensia mayuh dipeda udah ulih idup begulai enggau COVID-19.
Direktor Perubat Borneo Medical Centre (BMC), Kenny Yeap minta orang ke diperubat bekaul enggau COVID-19 patut datai berubat tumu dikena nyeliahka diri lama diinggap penyakit nya.
“Enti kita udah dikenuku dirampit COVID-19, nama pekara ke patut digaga kita iya nya kita patut berubat tumu laban nangika kita lama kena inggap penyakit tu. COVID tu kebendar penyakit ke ulih tagang, tang pemedis tu ulih lama dalam tubuh lalu nya mih pekara ti ngirauka ati raban doktor lalu benung dipansik silik,” ku iya maya dirandau TVS, Hari Enam.
Nangkan ke nya, entara kelai penyakit tu baka tubuh berasai lemi, pengeregas enggau sistem seput nyadi lubah, batuk rangkai, sada nyawa baka ke apas enggau sekeda ari sida ‘runggu ensing’.
Bisi 1-2 peratus pesakit ke dirampit igi penyakit tu dipelaba ngembuan sindrom pasca COVID-19 tu, nya alai raban perubat deka meda enggau ngemeratka sindrom tu taun 2023-2024 laban sida enda nemu sekalika penyakit baru tu pansut ari sindrom tu.
Dr Yeap meri saran ngagai mensia mayuh patut nganjung diri berubat tumu dikena nagang penyakit tu terus ngerekai ngagai orang bukai.
“Ungkup nagang pengerekai penyakit COVID tu endang baka selama, mensia mayuh patut nyeliah diri ari ngulu palan sekut, kena sengkabung mua, mesti udah divaksin.
“Udah nya pekara ke beguna seruran peresa diri empu sekalika kena rampit COVID-19 tauka enda lalu berubat lengkas enti ditemu kena rampit. Tu ulih nyeliah diri ari ngerampit orang bukai,”ku iya.
Sebelum tu, Ex-Menteri Pengerai, Khairy Jamaluddin, udah ngulihka Paxlovid enggau diberi ngagai palan pengerai peribit awakka ulih diberi ngagai pesakit enggau enda bebayar.
Dr. Yeap ngasaika tu atur ke pemadu manah laban ulih nentuka mensia mayuh muntang ngulihka ubat nya lalu nyeliah diri ari kena rampit igi penyakit Covid-19. – TVS
