KUCHING, 3 Dis: Jalai pengidup siku-siku orang enda sama, sekeda ari sida nya diatu dipeda orang udah berupai nyamai amat pengidup tang mayuh orang enda nemu baka ni pait manis ke kala diasaika sida nyentuk dipeda mujur baka ke diatu.
Pia mega pekara ke ditujah Ani Mail, 55, lebih 20 taun ngasaika pengidup nyadi kampar siti peneleba ke chukup pait dalam pengidup iya laban sekumbang timpuh nya iya semina ngiga belanja ba sebelah kaki lima dikena beridup sebedau ke begelar siku pedagang kraf ke chukup mujur.
Bekunsika kisah pengidup ke kala diasaika iya, Ani madah diri kala duduk malai tisi parit sereta ngandalka pengasih ari mensia mayuh ke mansa ngicha ke meri sesuap asi ninting hari.
“Nyau deka ninting hari, aku ngumpul kutak nyadika selap peninduk enggau tali PVC, enggau sebarang aja daun ke ulih dianyam nyadika bakul.
“Kelimpah ari nya, aku mega ngulihka upah bukai baka nyapu, nuchi pinggai lalu pengidup maya nya sempama kair pagi empa pagi, kair lemai empa lemai,” ku iya maya dirandau pemberita TVS , apin lama ke udah.
Bekunsi peneleba bekaul enggau pengelandik nganyam bakul bemban ke diulih iya ari mimpi maya beumur 16 taun, iya madah diri kala dilawa niang ini iya mesan ngasuh iya beranyam bakul.
Laban nitihka pengarap orang Iban kelia, tikai bemban semina ulih dianyam orang indu ke landik laban tikai tu dikelala entara anyam ke pemadu pedis digaga seret ngundam mayuh penti pemali.
Ani madah, pengawa beranyam bemban tu sebaka enggau kisah penenun pua kumbu, ke mai reti pengelandik ke dikembuan nya pemeri ari ‘Petara’.
Pengudah tedani, aku berumban nganyam bakul nitihka motif ke udah diasuh niang (dalam mimpi) ninting hari sampai diri empu landik,” ku iya.
Nya alai, iya lalu mekuhka pengawa beranyam bakul bemban kelimpah tama babas begigaka buluh, daun apung, mengkuang enggau linti bemban.
“Pengawa ke dikerindu aku iya nya maya kami bebala mayuh beranyam bakul tauka tikai bemban ba ‘ruai’ rumah panjai begulai enggau diri sebilik.
”Iya ke bereti, tikai bemban ke udah tembu digaga deka nyadi antap peninduk tauka endur temuai duduk.
“Tikai bemban suah dianchau ba semua ruai rumah panjai enti bisi pengawa berandau tauka pengari sereta maya temuai bisi niki rumah panjai.
“Genap kali semak pengerami Gawai, kami begulai enggau diri sebilik beripai, nyumai enggau mandangka krafjari ke udah tembu ngagai temua. Nya mih kenang ke enda ulih dibuai nyentuk ke sehari tu,” ku iya.
Kelimpah kala nyadi kampar, Ani madah penusah pengidup kenyau ari mit sereta enda kala ngasaika baka ni asai sekula tang maya agi mit suba diisi enggau pengawa mantu apai indai ba rumah panjai laban ke semampai suntuk belanja.
Lebuh umur udah belinsur nyadi orang besai tuai, Ani madah diri kala nikah maya umur agi biak tang laki iya midang ketegal mabuk pemakai urung taun 80-an.
“Aku bisi siku anak indu. Diatu aku enggau anak indu aku nya enda kala betemu laban entua iya enda ngemendarka iya betemu enggau aku. Kami duai beserara lebih ari 20 taun,”ku iya seraya ngendas ai mata.
Ku Ani, iya enda nemu sekalika udah bisi uchu tauka nadai lalu iya endang ngarapka diri ulih betemu enggau sida.
“Arapka pekara nya, nyadi perais Krismas ti deka datai,” ku iya.
Nangkan ke nya, Ani madah diri lari ari menua asal iya di Song ketegal bisi penyarut enggau sida sebilik lalu ngujungka iya nguji ngiga jereki ba Sibu.
Asai takut sigi seruran bisi diumba nadai ngembuan sebarang dokumen pengelala baka tingki enggau surat beranak.
Ku iya, pengidup enda nyalah baka pengidup orang ari menua luar ke datai nadai pemendar (PATI) ke Sarawak.
“Maya ba Sibu, kami diau ba WAP penyangkai kapal lalu pengidup maya nya tauka dikumbai rindu laban seruran bisi bala bakih ke sama ngampar enggau begulai.
“Aku diau din chukup lama, nyangka lebih ari 20 taun. Kami begulai ngiga belanja lalu bela betulung pangan diri.
“Tang, laban mayuh nya ‘pambar’ ketegal pekara enda disadang, aku ngidupka diri ba puak mengeri Sibu sebedau betemu enggau staf TTG,” ku iya.
Jeman petang ke diasaika Ani nya ngalih tampak ba ujung taun 2021, maya nya mih pengidup iya berubah pengudah iya entara siku ari 57 kampar ti dibantu lalu dianjung ngagai Palan TTG di Jalai Sanyan, Sibu.
Kenu ku staf TTG Sibu, Dayang Azrina Awang Azman, 46, raban nembiak tetemuka Ani maya nya benung kiruh ngumpul kutak ba belakang kedai renchit.
“Raban kami ba TTG nemu nama kebuah Ani suah ngumpul tali PVC, tu laban iya deka nguna nya dikena beranyam,” ku iya.
Ku iya, iya temegah meda pengelandik Ani beranyam semina ngena tali PVC.
“Kelimpah mantu kampar, kami mega bisi nyendiaka bemacham latih ba palan tu dikena nyidi penau ke bisi dikembuan sida sereta meri bantu bukai dikena neruska pengidup.
“Ani kala madah, tali-tali kutak nya kala digaga ke iya tikai dikena sida tindu ka kaki lima.
“Kenyau ari nya, iya mega bisi ngajar kami beranyam bakul ba palan tu. Iya mega siku pengajar ke serius enggau lurus ati.
Ani mega madah, iya berasai gaga meda krafjari ke digaga iya dikerinduka mensia mayuh.
Ku iya, Ani enda nyangka diri ulih nyadi orang dagang laban pengidup iya sebedau tu kelalu tusah baka ke nadai tuju ketegal ti nyadi kampar.
“Diatu aku ulih ngasilka penatai pemisi mimit ari pengawa bejual bakul tu. Bakul tu berega RM15 nyentuk RM35 bepanggai ngagai motif, sais, chura enggau fesyen iya.
Tandu iya, Ani bisi ati deka muka kelas beranyam ngajar orang ke biak kelimpah dikena ngetanka adat pesaka bansa Iban.
Nangkan ke nya, Dayang Azrina madah mensia mayuh ti deka meli produk krafjari digaga Ani enggau pengani TTG tau datai ngagai tujuh kiosk stesyen minyak Petronas Sibu sepanjai bulan Disember tu.- TVS
