KUCHING, 2 Dis: Perintah Sarawak nengah Opis Menteri Infrastrakcha Enggau Pemansang Penyangkai Kapal (MIPD) deka terus beratika enggau silik chara ke pemadu nemban dikena ngaga jalai enggau jematan nitihka rega tauka ungkus ke udah ditetapka sereta nentuka siti-siti projek nya mesti tembu.
Sapit Premier Sarawak ke mega Menteri Infrastrakcha Enggau Pemansang Penyangkai Kapal Sarawak, Datuk Amar Douglas Uggah Embas madah semua projek infrastrakcha mesti tembu digaga ngambika projek nya enda nyadi projek sakit.
“Perintah meri projek, duit baka chunto sida iya meri duit dikena ngaga jalai baka di Nanga Menjuau laban sida arap dalam setaun ngagai dua tauka tiga taun jalai udah tembu lalu bisi ngubah pendiau pengidup rayat diak,” ku iya.
“Rayat diak pan nama udah dipadahka senentang bisi jalai, sida ngarapka jalai nya endang bisi ke alai diatu sida semina ngena perau, lalu pekara tu ngenusahka sida. Nya alai enti utai nya patut tembu 3 taun iya patut tembu 3 taun laban nya utai ti dikarapka rayat”, ku iya madah.
Ku iya, nya entara pengawa ti diberi perati MIPD enggau Opis Kereja Raya (JKR) Sarawak nentuka tetiap projek ke digaga tembu sereta meri pemaik ba dalam pengidup rayat, tebal agi sida ke mendam ba menua ulu enggau menua pesisir.
Nangkanka nya Uggah ke mega Kaban Kunsil Nengeri (ADUN) Bukit Saban madah kunteriktor ti dichiri bagi bejalaika projek nya patut ngembuan puku sekalika pengelandik.
“Ni chara nentuka ngiga kunteriktor ke endang bisi puku, bisi penemu, chukup pengereja pengawa sereta chukup kereban dikena gawa awakka sida ulih bejalaika projek tu enggau lanchar sereta tembu nitihka ripih tauka saran ke udah ditetapka.”
Iya mansutka jaku nya maya ditanya pengarang berita TVS di opis iya empai lama ke udah.
Ba pengerembai bukai, rambau Aum Kunsil Nengeri (DUN) Sarawak lebuh hari empat iya madahka jalai baru sepanjai 1,200 kilometer mesti digaga di Sarawak dikena nentuka akses jalai darat nyentuk ke menua pesisir ba nengeri tu nyapai 100 peratus.
Ku iya madah agi jalai nya dijangka ulih nyambung penyampau 381 genturung pendiau ba serata nengeri tu.
Naka ke diatu, bisi 5,833 tauka 94 peratus ari 6,214 genturung pendiau ke direjister ba menua pesisir udah datai jalai alun ke manah. – TVS
