MUKAH, 29 Nov: Semua gerija raban Kristian di Mukah deka ngambi bagi bejalai bebala mayuh kena 10 Disember tu ba Astaka Dataran Menara Pehin Setiaraja.
Program nya diatur All Churches of Sarawak (ACS) Pampang Mukah dipelaba bepun ari pukul 6 lemai sereta deka digulu Kaban Kunsil Nengeri (ADUN) Tellian Royston Valentine.
Kenu ku, Chairman Pengatur Program Richard Revis Jinmin, tuju pengawa bejalai bebala mayuh nyerumba Krismas nya diatur laban deka nyadi siti kelai pengerami Hari Krismas sereta ngerami raban Kristian nengah gempung gerija-gerija ke bisi nyadi kaban ACS ari selampur Mukah enggau Dalat.
“Seriris enggau rambai jaku program tu iya nya “Unity in Christ” nya tentu deka mai reti penyerakup enggau ngempung raban raban Kristian nadai ngira ari ni pampang pengarap laban tuju endang sama iya nya ungkup Kristus.
“Pengawa bejalai beraban baka tu kala diatur ACS urung tiga nyentuk empat taun ti udah tang enda ulih diatur dua enggau tiga taun tu tadi, ketegal pangka pandemik Covid-19,” ku iya.
Iya mega ngarap program bejalai beraban ti deka diatur taun tu mujur enggau bejalai enggau lanchar dikena nyerakupka gerija-gerija ke bisi ba Mukah.
“Ketegal ungkup Kristus enggau kerejasama ke tegap ti nyereminka pengasih Kristus enggau mandangka penyerakup pupu bansa ke bisi ba Mukah lebih agi ba Sarawak.
“Ngagai semua penyereta ti deka ngambi bagi maya program tu ila ngarapka sida bela nyaga pemeresi, nyaga takah enggau seruran ngena sengkabung mua enggau tentuka diri empu ferai tauka sapa ke bisi kelai Covid-19 tau enda ibuh enggau,” ku iya.
Program nya dipelaba berengkah pukul 7.30 lemai ba Dataran Pehin Setiaraja, ditangkan nengah Ah Soon Corner, mansa Taman Boulevard Setia Raja, ditangkan nengah kandang Agro Bank Mukah, negah Opis Orang Gawa enggau pulai nikal ngagai Dataran Pehin Setiaraja.
Naka tu, ACS Mukah diarika tuai gerija-gerija ari mayuh gerija di Mukah baka Mukah Baptist Church, Borneo Evangelical Mission, Roman Catholic Church enggau Methodist Church, entara gerija bukai ke dikangau iiya nya Gerija 611 Bread of Life. – TVS
