KUCHING, 30 Nov: Kaunsil Tusun Adat Sarawak (MAIS) diatu dalam proses meresa baru tujuh adat ti dikategorika awak senutuk enggau penyadi rama dalam komuniti.
Tujuh bengkah tauka kategori adat tu iya nya Adat Iban 1993, Adat Bidayuh 1994, Adet Kayan-Kenyah 1994, Adat Bisaya 2004, Adat Lun Bawang 2004, Adet Kelabit 2008 enggau Adet Penan 2011.
Menteri ba Opis Premier Datuk John Sikie Tayai madah, proses meresa digaga beduduk ari sekeda ungkup dalam adat nya nadai agi senutuk enggau ubah penyadi rama ba sekeda komuniti orang asal.
“Ambika chunto, nadai siti adat ke ngerara pengawa beselapat rumah panjai ba komuniti Iban.
“Dalam kes tu, rumah panjai ke pechah nyadi rumah panjai kedua enggau ketiga agi dibaruh bidang kuasa sitak rumah panjai ke lama,” ku iya maya sesi betalat ungkup bacha kedua kali Rang Undang-Undang Perbekalan (2023) ba Aum Kunsil Nengeri (DUN) Sarawak ditu, Hari Dua.
John Sikie mega madah beduduk ari nya, adat-adat ke udah dikategorika patut dipansik baru enggau tuju nukar ngagai kategori tauka kod baru senutuk enggai penyadi rama ke maya hari dalam komuniti.
“Empat kod adat tu benung ba renggat pemungkal proses diperesa iya nya Adat Bidayuh 1994, Adet Kayan-Kenyah 1994, Adat Bisaya 2004 enggau Adat Lun Bawang 2004.
“Udah nya, lima kod adat ke bukai iya nya Adet Melanau, Adet Berawan, Adet Kajang, Adet Bagatan enggau Adet Kiput diatu ba proses digaga enggau ditisih,” ku iya. – TVS
