KUCHING, 29 Nov: Perintah Sarawak setuju ngeluarka dokumen sementara (DSITKS) ngagai orang tauka nembiak ti ada ba Sarawak beumur baruh ari 21 taun sereta empai ngembuan status peranak menua, ku Dato Sri Fatimah Abdullah.
Menteri Pemansang Orang Indu, Anak Mit enggau Pengelantang Komuniti (KPWK) Sarawak nya madah, dokumen tu tu dikeluarka khas dikena ngemuntangka sida ke ngibun dokumen nya ulih besekula enggau berubat ba sepital perintah di Sarawak, tang nya ukai dokumen peranak menua Malaysia.
“Nya kebendar ukai meri hak tauka jamin meri status peranak menua Malaysia ngagai sida ke bisi dokumen tu.
“Peminta ungkup DSITKS ulih dipinta terus ba opis menteri tauka nengah Opis Pelilih (D.O) ke dampih,”ku iya madah ngagai pemberita ba aum pemberita diatur di Bilik Media Sarawak Kompleks Kunsil Nengeri (DUN) ditu, Hari Dua.
Nangkan ke nya, Fatimah madah peminta nya patut disempulang enggau surat pengada ke berejister ba Sarawak tang empai bisi status Peranak Menua; lalu kama minta nyadi peranak menua Malaysia nitihka ‘Artikel 15A Perlembagaan Persekutuan’.
“Timpuh sah nguna DSITKS iya nya pengelama dua (2) taun berengkah haribulan peminta digaga.
“Peminta nya mega ulih dilanjarka timpuh nyema sida ke ngibun dokumen tu lalu bedau bulih status peranak menua,” ku iya.
Fatimah madah, DSITKS patut dianjung baru ngagai opis menteri sepengudah orang ngibun dokumen tu bulih status peranak menua tauka bulih tingki.
Ku Fatimah nerang, kenyau peminta DSITKS dibuka berengkah 1 November 2022, Opis Menteri udah nerima 60 iti peminta.
Berebak enggau nya, Fatimah mega madah perintah nengeri udah ngatur program abas terus nengah MPS begulai enggau bakih strategik nyengkaum Opis Pelilih, Opis Pengerejister Bansa Menua Sarawak enggau Opis Imigresen Malaysia, Sarawak di CSSC Kuching, Abell Road kena 2 Disember, di Sepupok, Niah kena 8 Disember, di Hotel Seri Malaysia, Lawas kena 10 Disember, enggau ba Destiny for Children Centre, Sibu kena 12 Disember 2022.
Ku iya, atur regas nya dipejalaika awak mayuh agi anak mit ke nadai status peranak menua ulih besekula maya sekula dibuka taun baru (2023). – TVS
