KUCHING, 27 Nov: Atur meri subsidi nuju raban ke disaran mesti datai ba sida ke amat-amat begunaka bantu, ku Datuk Seri Anwar Ibrahim.
Menteri Besai madah, iya meri timpuh dua minggu ngagai opis enggau ejensi bekaul bejalaika pansik enggau beratika semua pekara ke bekaul ngambika subsidi nya diberi lebih nemban.
“Pagi tadi (aku) betuaika Aum Khas Kaunsil Pengatur Ungkus Pengidup Menua 2022 begulai enggau opis enggau ejensi perintah berundingka isu ungkup pengidup ke majak tinggi enggau ngenusah rayat lebih agi raban ke mesekin sereta merinsa,”ku iya nengah penerang ke dibantaika ba laman Facebook Anwar Ibrahim, sehari tu.
Nangkanka nya, Anwar mega madah timpuh dua minggu ke diberi nya endur berandau enggau sektor peribit sereta pemeranak puku awakka sida meretika tuju subsidi diberi iya nya dikena ngelempungka tating belanja ke ditapi raban orang mesekin.
“InsyaAllah, pengudah tembu semua atur pengawa ngaduka kabinet ila, aku enggau raban kabinet menteri deka ulih beratika semua polisi tu ngambika diperunding enggau diputarka lengkas,” ku tandu iya.
Sama datai ngulu aum tu iya nya Kepala Sektretari Menua Tan Sri Mohd Zuki Ali, Gabenor Bank Negara Malaysia Tan Sri Nor Shamsiah Mohd Yunus, Pegawai Ari Opis Banchi, Opis Menteri Pengawa Dagang Dalam Menua Enggau Pekara Bebelika Barang, Opis Menteri Pekara Wang, Opis Menteri Betanam Betupi enggau Industri Pemakai sereta Opis Menteri Bekal Kuasa enggau Pengeraja Asal.-TVS
