SARIKEI, 27 Nov: Kaban Parlimen Tanjong Manis, Ir Yusuf Abdul Wahab ngarap mayuh agi pengari rayat Gabungan Parti Sarawak (GPS) diperunding mangku pengawa dalam kabinet Perintah Beserakup beduduk ari pemayuh penuduk ke dimenang ba Pengawa Bepilih Besai ke-15 (PRU-15) tu tadi.
Taja pia, iya madah, pemutus nya bepanggai ngagai pemintar Menteri Besai enggau raban iya nyukung aja sebarang aja pemutus ke pemaik enggau penegap menua.
“Aku ngarapka mayuh pengari rayat Parlimen ari Sarawak dipilih dalam Kabinet ti deka dibantai udah tu, laban kitai menang 23 penuduk tauka 23 pengari rayat dalam Perintah Beserakup tu, nyadi kitai ngarapka mayuh agi pengari rayat ari Sarawak deka nyadi Menteri tauka Sapit Menteri Besai dalam Kabinet,” ku iya maya dirandau pemberita ba Sarikei kemari.
Iya madah, atur nya beguna amat laban Sarawak agi randaka pemansang lebih ai ba sitak menua pesisir enggau menua ulu.
Nya alai, iya mega ngarapka runding ke sepenemu dalam numbuhka perintah ulih mai pengelantang enggau penyenang.
“Baka ke ditemu kitai, Sarawak enggau Sabah agi randaka pemansang. Nyadi nyema menteri nya ari Sarawak ngiring sekeda opis menteri ke besai guna baka nuju pemansang menua pesisir, nyadi tu deka ngelengkaska agi pemansang ba Sarawak enggau Sabah,” ku iya.
Berebak enggau nya, GPS negapka kuasa iya ba Parlimen pengudah menang 23 penuduk ba PRU-15.
Penyampau nya berupai manah agi ari 19 kerusi ke dimenangi maya PRU ke-14 suba maya agi dibaruh Barisan Nasional (BN) taun 2018.-TVS
