KAJANG, 24 Nov: Menteri Besai (PM), Datuk Seri Anwar Ibrahim madah kemisi hari besai kena Hari Satu minggu baru.
Anwar madah, iya udah berandauka pekara nya enggau Kepala Sekretari Menua, Datuk Seri Mohd. Zuki Ali.
“Kebendar aku mega udah besemaya enggau Yang di-Pertuan Agong (pasal kemisi) tang pekara tu bedau tembu (numbuhka perintah) nyadi kitai nginsur ngagai Hari Satu minggu baru,” ku iya ba aum pemberita tadi.
Sama datai, bini Menteri Besai, Datin Seri Dr Wan Ismail Wan Ismail.
Tu nyadi aum pemberita keterubah Anwar pengudah angkat sumpah nyadi Menteri Besai Ke-10 ba mua Al-Sultan Abdullah Ri’ayatuddin Al-Mustafa Billah Shah di Istana Negara, lemai Hari Empat.
Pengawa nyiri Anwar nya ngujungka badu penyarut pasal penumbuh perintah kenyau Hari Minggu ke udah lepas Pengawa Bepilih Besai Ke -15 (PRU-15) ti ngemataka Parlimen tegantung keterubah iya pengudah nadai sebarang gempung politik ke menang majoriti mudah 112 penuduk.
Anwar diatu ngiring perintah beserakup ti diarika Pakatan Harapan (PH), Barisan Nasional (BN), Gabungan Parti Sarawak (GPS), Parti Warisan Sabah (WARISAN), Parti Bangsa Malaysia (PBM), Muda enggau pengari rayat bibas. – TVS
