KUCHING, 23 Nov: Rang Undang-Undang (RUU) Turu Pesaka Bansa udah dikemendarka ba Aum Kunsil Nengeri (DUN) Sarawak, kemari.
Tu mandangka Sarawak nyadi nengeri keterubah bisi Turu Pesaka Bansa nya ba menua tu.
RUU nya ti nguna agih belanja pemun sepenyampau RM8 bilion dibantaika Premier Sarawak Datuk Patinggi Tan Sri Abang Johari Tun Openg seraya disukung 10 iku Kaban Kunsil Nengeri (ADUN) pengudah dipejuraika.
Beduduk ari nya, Abang Johari ke mega Menteri Pekara Wang Sarawak nerangka, turu nya ditumbuhka dikena nambahka penguntung ari rizab modal lebih nengeri nengah pengawa beranakka puku.
“Turu tu mega nyadi duit turu pengawa meranak puku khas ti dipenggi perintah Sarawak ngambika ulih nambahka penguntung enggau nyendiaka ekonomi ke meruan sereta tegap.
“Turu tu deka diatur nengah chara profesional enggau lurus ke dipejalaika Komiti Nyaga (Board of Guardians) ti ngaul raban pakar sereta profesional ba dalam bidang pekara wang enggau meranak puku,”ku iya.
Nangkanka nya, iya madah diri deka nerima perambu enggau timbal penemu ke diberi dikena ngemanah RUU nya.
Ku iya, sigi beguna nukar reta ke enda ulih dikena baru nyadi retawang ke ulih ngintu sereta nambahka asil nengeri Sarawak.
Sebedau tu, Abang Johari madah, turu nya deka bechuanka ‘Government Pension Fund Global’ ti dikena ba menua Norway nya dipelabaka berengkah dikena dalam timpuh dua taun agi. -TVS
