KUALA LUMPUR, 22 Nov: Barisan Nasional (BN) deka minta ngagai Yang di-Pertuan Agong Al-Sultan Abdullah Ri’ayatuddin Al-Mustafa Billah Shah nangguhka atur betemu ke ditaga sehari tu.
“Ukai ulah kami nyerita ngagai mensia mayuh. Sekali (deka) minta ditangguh (betemu) tauka enda, kita deka nemu pagila (sehari tu),” ku Tukang Wang Besai BN Datuk Seri Hishammuddin Tun Hussein madah ngagai pemberita pengudah Aum Supreme Kaunsil BN ditu, kemari.
Berebak enggau nya, Sapit Presiden MIC Datuk Seri M.Saravanan ngaku pekara nya, madahka BN agi mengkang enggau pemutus nadai nyukung sebarang gempung ti deka numbuhka perintah.
“Kami ngarapka (pengawa betemu sehari tu) ulih ditangguh…eda nemu ulih ke enda. Kami ukai deka numbuhka perintah, tang deka madahka penemu kami aja (maya betemu),” ku iya.
Al-Sultan Abdullah sehari tu ngerah 30 Kaban Parlimen BN betemu enggau Seri Paduka di Istana Negara siku-siku berengkah pukul 10.30 pagi tu legi. -TVS
