KUCHING, 22 Nov: Gabungan Parti Sarawak (GPS) ngelempaika ngagai pemintar Duli Yang Maha Mulia Yang Dipertuan Agong Al-Sultan Abdullah Ri’ayatuddin Al-Mustafa Billah Shah ngaga pemutus nyiri Menteri Besai ngiring perintah dikena negapka menua tu nengah kuasa iya bepelasarka Kunstitusyen Malaysia.
Nitihka sebengkah penerang dibantaika Opis Premier Sarawak sehari tu madahka GPS udah mantaika langgur numbuhka perintah nengah gempung Perikatan Nasional (PN), Barisan Nasional (BN), GPS enggau Gabungan Rakyat Sabah (GRS) ngarika komuniti Malaysia laban mungkur semua bansa enggau pengarap.
Nya alai, beduduk ari penyarut ke nyadi ba Semenanjung Malaysia, GPS ngasaika mandat rayat mesti dibasa.
GPS nyemetak madah pekara menua mesti dikemerat sereta penumbuh perintah ke tegap patut ngira pemaik rayat enggau menua ngelui ari pekara ti nguntungka diri empu.
Ungkup penemu, bepelasarka penerang ti dibantaika Istana Negara kemari, dia Agong udah setuju nitihka peminta semua tuai gempung parti politik di menua tu bela mantaika nama chalun Menteri Besai ke-10 kena pukul 2 ngalihari tu legi.-TVS
