KUCHING : Diatu kitai patut ngiga gempung perintah ke ulih ngatur ekonomi enggau manah sereta nentuka perintah ke tegap, ku Dr. Lucy Sebli Seidelson.
Pengelicha Fakulti Sains Sosial dan Kemanusiaan, Universiti Malaysia Sarawak (UNIMAS) madah, nya mih pekara ke pemadu beguna penapat laban enti perintah kitai enda tegap dia ekonomi enda ulih bejalai enggau meruan.
“Diatu kitai beratika ekonomi menua enda berapa manah, politik sebedau tu enda berapa tegap laban perintah ti suah betukar.
“Diatu barang nyadi mar, tu ngenusah orang di menua pesisir. Kelimpah ari nya mayuh pemeranak puku ba menua tu mindah ke menua bukai,” ku iya.
Dr Lucy madah munyi nya maya dirandau nengah Program Randau Malaysia Decides Pasca PRU-15 ti dipandangka ba TVS bejuraika topik ‘Pengandal Ngagai Pengari Rayat Baru’ di Studio TVS ditu, malam tadi.
Nangkan ke nya, lebuh meri timbal bekaul enggau langgur Gabungan Parti Sarawak (GPS) ti deka begempung enggau Perikatan Nasional (PN), Barisan Nasional (BN) sereta Gabungan Rakyat Sabah (GRS) numbuhka perintah besai iya madah enti pekara tu amat nyadi deka ngemataka Tan Sri Muhyiddin Yasin deka nyadi menteri besai ti kedua kali.
“Taja pia siti utai ke nyangka deka nyadi penanggul laban dalam PN tu parti PAS entara parti ke chukup mayuh pengari menang.
“Baka ni sida ngatur tu ila? Nya mih pekara ke chukup matak ati laban majoriti kitai ba Sarawak ditu enda berapa rinduka ideologi ke dibai parti PAS,” ku iya madah nyemetak.
Ungkup penemu, lemai kemari mega nengah sebengkah aum pemberita Premier Sarawak, Datuk Patinggi Tan Sri Abang Johari Tun Openg madah pasal perambu GPS ti deka begempung numbuhka perintah besai begulai enggau PN, BN sereta GRS.
Taja pia, pagi tadi pekara nya ditingkah Chairman Barisan Nasional Dato Sri Dr Ahmad Zahid Hamidi ti nyemetak madah diri lalu empai berandau enggau sebarang gempung parti dalam numbuhka perintah besai.
Beduduk ari nya, sebarang penerang ti ngaitka BN enggau sebarang gempung kebendar pekara nya enda sah, ku iya nengah aum pemberita ke diatur di Kuala Lumpur pagi tu tadi.
“Sebarang penerang ti ngumbai BN udah nyereta sebarang gempung kebendar nya enda betul.
“Kebuah pia, naka tu agi nadai sebarang randau digaga begulai enggau sida PN.
“Nya alai, udah tu sebarang pemutus semina deka deka digaga pengudah komiti ke ditumbuh kami berandau enggau sapa-sapa aja gempung ti deka numbuhka perintah besai,” ku iya seraya madah BN deka nganjung surat besumpah (SD) bekaul enggau sapa disukung nyadi menteri besai ngagai Istana Negara nitihka timpuh ke udah ditetap.-TVS
