KUCHING, 21 Nov: Sepenyampau RM1.12 bilion Bajet Sarawak 2023 diagih dikena bejalaika pemansang infrastrakcha di Sarawak, lalu tu entara agih belanja ke besai dikemendarka perintah nengeri.
Premier Sarawak, Datuk Patinggi Tan Sri Abang Johari Tun Openg madah, penyampau nya deka dikena ngemansangka jalai alun enggau jalai besai, jematan, penyangkai kapal sereta infrastrakcha sungai lebih agi ba kandang menua pesisir.
“Entara pemansang infrastrakcha besai nyengkaum ngaga langkar enggau pemansang jalai alun ba Inner Road, Kuching, ngaga jalai ari Sibu Jaya ke Jalai Kong Yit Khim, Sibu, ngaga Jalai Pakan/Ulu Kota, Pakan, Sarikei (Fasa 3) sereta nganti tujuh jematan sementara ba baruh fasa 1 ngagai jematan ke lebih tegap, ngemanah Jalai Oya, Sibu, nyeruri infrastrakcha mensia mayuh ke rusak, sungai jematan Limbang, sungai Bunut No 2 enggau jalai penyambung, Limbang, Program Transformasyen Menua Pesisir, endur ngengkah kerita sereta perengkaguna ba penyangkai kapal Senari, ” ku iya rambau mantaika Bajet enggau Ekonomi Baru ke ngaul RUU Perbekalan (2023) 2022 ungkup Penggal Keterubah Aum Kunsil Nengeri (DUN) Sarawak Ke-19, ditu pagi tadi.
Abang Johari nerangka, pengawa ngaga sekeda projek infrastrakcha ke nguna ungkus belanja manggai bilion ringgit benung dipejalaika enggau dibayar ba baruh inisiatif Bayar Alternatif baka Bungkur Jalai Tebing Tasik, Bungkur Jalai Kedua, Padang Bilun Pandak Bukit Mambong, sereta Sistem Perengka Pengangkut Mengeri Kuching.
Berebak ari nya, iya mega madah, perintah nengeri deka nentuka semua pemansang ti dirintai nya deka dikerembaika ba serata Sarawak awakka mantu nyungkak ekonomi rayat sereta ngelengkaska agenda pemansang nengeri tu.
“Nya kebuah, perintah Sarawak numbuhka tiga ejensi pemansang kandang menua baru ti nyerangkung Ejensi Pemansang Ejensi Terkoordinasi Greater Kuching (GKCDA), Ejensi Pemansang Bagi Menua Betong (BDDA), sereta Ejensi Pemansang Delta Rajang (RADDA).
“Pekara tu mega seriris enggau chara kami ti deka negapka enggau nurunka kuasa bejalaika pemansang ba semua kandang menua ngambika semua projek pemansang sebela sereta lanchar dipejalaika. – TVS
