KUALA LUMPUR: Polis Diraja Malaysia (PDRM) ngenukuka tiga pengundi midang maya nganti gintir ngundi ba Pengawa Bepilih Besai Ke-15 (PRU-15) sehari tu.
Kepala Polis Menua Tan Sri Acryl Sani Abdullah Sani madah, dua pemidang nya nyadi ba Johor lalu siku ba Kelantan.
“Tiga penyadi nya ngasuh sinu laban pengundi tu bisi penanggul pengerai lalu midang maya nganti gintur ngundi,” ku iya ba aum pemberita ke diatur ba Indu Opis Polis Daerah Gombak, ditu, tadi.
Acryl Sani madah, maya atur ngundi sehari tu, bisi siti insiden ngaul siku lelaki beumur 23 taun, ke mega pesakit bepenanggul runding, ngereja ulah enda disadang ngerampas sebutul dawat lalu ngejuka peti undi di Sekula Primari Ulu Yam Lama, Batang Kali, Selangor.
Ngelansa pasal penyadi ba Johor, Komiti Pengawa Bepilih Besai Raya (SPR) nengeri ba penerang iya madahka seduai nya orang tuai beumur 85 taun ti midang, bela ba palan ngundi Parlimen Sembrong enggau Parlimen Pulai, pagi tadi.
Nitihka penerang SPR, Sh Juhara Syed Mohamad midang pukul 9.30 pagi ba Palan Ngundi Sekula Sekondari Sultan Ismail, Johor Bahru.
“(Pengundi) diperati parai ngenyit pengudah ngundi enggau dipeda sendat seput.
“Pengundi nya dipeda datai ngelawa ruai ngundi enda berapa regas asil perati staf ke gawa tang neruska pengawa muai undi,” ku penerang nya.
Tandu penerang nya mega, Tuminah Ambiah parai ngenyit kena 10.21 pagi ba Sekula Primari China Cina Lit Terk, Kluang.
“Orang tuai nya midang ngenyit sebedau ngundi enggau pemidang iya dikenuku ke staf Opis Menteri Pengerai Malaysia ke bisi ba endur nya,” ku SPR Johor. – TVS
