KUCHING, 18 Nov: Perintah Sarawak nengah Unit Pekara Pengarap Bukai (UNIFOR) ba baruh Opis Premier Sarawak terus chakah mekuhka pengelantang pengarap ukai Islam ba nengeri tu.
Sapit Premier Sarawak, Datuk Amar Douglas Uggah Embas madah, perintah nengeri udah ngungkupka belanja sepenyampau RM320 juta ti dikena bejalaika projek ngaga sereta nyeruri rumah sembiang.
“Sebedau UNIFOR ditumbuhka, bedau bisi opis tauka ejensi ke diberi pengawa ngintu pengelantang sereta peminta guna pengarap bukai.
“Kitai bisi nerima mayuh ripot senentang rumah sembiang ke repuk sekalika bisi atap tang nadai dinding, bisi tiang tang nadai atap, bisi sekeda atap nyau tuduh.
“Taja pia, semua penanggul nya tadi udah mujur diputarka pengudah kitai numbuhka UNIFOR ke dipeda bisi daya ngubah landskap enggau ngemanahka rumah sembiang ke repuk di Sarawak,” ku iya rambau Program Apresiasi UNIFOR Bagi Menua Kuching, kemari.
Program nya dipenyadika Premier Sarawak Datuk Patinggi Tan Sri Abang Johari Tun Openg.
Entudika nya, Uggah ke mega menteri megai tanggungpengawa ngatur UNIFOR nerangka, duit turu RM320 juta nya nyerangkung RM215 juta ti dikemendarka dikena ngemansangka mayuh macham rumah sembiang kenyau ari taun 2017 nyentuk 2022, kira-kira RM30 juta dikena ngemanahka sekula mubaligh ba taun 2021 enggau 2022, seraya laluh ke bukai dikemendarka ba baruh projek rayat kenyau ari taun 2017 nyentuk 2022.
“Penyampau RM255 juta mega udah diungkupka ngagai UNIFOR kenyau ari taun 2017 dikena nyaup pengawa ti dipejalaika UNIFOR pengudah ditumbuhka ba taun 2017,” ku iya.
