KUCHING, 18 Nov: Chairman Gabungan Parti Sarawak (GPS), Datuk Patinggi Tan Sri Abang Johari madah, pemujur besai GPS rambau Pengawa Bepilih Besai Ke-15 (PRU-15) tu ulih nentuka Sarawak terus kering mantaika jaku enggau penemu ba Parlimen dikena ngetanka sereta mulaika hak enggau ungkup Sarawak.
Beduduk ari nya, ku iya, GPS ukai semina mutus ati tang senaka ulih deka negika menua nitihka juluk ati enggau peminta rayat Sarawak.
“Perintah GPS deka meruan siru enggau betatika nasit raban B40, M40, raban nembiak, nembiak sekula, pengereja pengawa, pedagang, orang lunggar umur, OKU, orang gawa perintah, pia mega genap ruang bilik enggau semua rayat enda ngira bansa enggau jalai pengarap.
“Tu semaya enggau pengangkun kami ba GPS. GPS ngembuan rikod ngaduka pengawa ti chukup manah lalu udah mandangka pengulih diri bejalaika pengawa megai sereta ngemansangka Sarawak,” ku iya madah nengah siti surat ti dituju ngagai pengundi Sarawak sehari sebedau hari ngundi PRU-15 ti diatur hari enam kena 19 November tu.
Abang Johari ke mega Premier Sarawak nerangka, 19 November 2022 rayat deka ngaga pemutus ke chukup besai amat reti.
“Sarawak ti maju sereta tampak rita jemah ila bepanggai bendar ba tunjuk jari semua kitai.
“Perintah GPS mujur bejalaika 120 iti polisi enggau inisiatif nyengkaum bantu ngelempungka penyuntuk belanja ti nating rayat maya dituntung penyakit COVID-19,” ku iya.
Iya madah, nulung rakyat mutarka penusah ti baka nya pekara ti amat dikemeratka perintah GPS, kelimpah ari nulung semua rayat ari sukut pengerai, ekonomi enggau batang pengawa.
“Rayat seruran ba ati perintah GPS. Agi kini kita ingatka ulah Perintah Pakatan Harapan (PH) ti enda manah nekan sereta nempayaka Sarawak maya merintah 22 bulan? Sida enda ibuhka pengelantang enggau pengidup kitai.
“PH nginsil mayuh projek ti tau mai pengelantang ngagai semua kitai. Mayuh semaya PH puntan. Nyadi, ingat mih ka jaku tangkan orang kelia. Anang “pisang bebuah dua kali” lalu “anang sampai asi nyadi bubur,” ku iya madah agi.
Berindik ari nya, Abang Johari madah, iya sekali agi enggau ati ti baruh minta sukung rayat ngundi GPS baka ba PRN-12, maya bulan Disember taun siti nyin suba.
“Undi ungkup GPS iya nya undi ungkup Sarawak dikena nentuka pengidup kitai, enggau pengidup anak uchu kitai jemah ila menyana agi.
“Aram mih kitai sama-sama ngayanka pengasih enggau penyayau ke menua kitai, Sarawak,” tandu iya. – TVS
