JULAU, 18 Nov: Sarawak deka ngelangkar mekanisme baru dikena beratika tikas penyeranta seriris enggau ubah sereta gaya sosioekonomi rayat ba nengeri tu.
Premier Sarawak, Datuk Patinggi Tan Sri Abang Johari Tun Openg madah, singkang nya patut diambi berindik ari chara tauka metodologi ke diguna Unit Pengawa Merambu Ekonomi (EPU) di Kuala Lumpur ti bebida.
Abang Johari nerangka, iya udah baum enggau Menteri Ba Opis Menteri Besai (Ekonomi) Datuk Seri Mustapa Mohamed chara dikena nyukat pengaya ti dipenggi siku-siku orang mesti bepelasarka asil penatai pemisi sereta reta.
“Enti sema sida bepanggai ba asil penatai pemisi duit, pekara baka tu ulih meri penyaru nyentuk siku-siku orang nya agi ulih nerima bantu E-Kasih,” ku iya pengudah ngulu Program Tuai Begulai enggau Rayat ba Julau lebuh Hari Empat.
Iya madah, penanggul nyadi maya penerima E-Kasih agi keran enggai pansut ari status nya ketegal deka terus nerima bantu.
Abang Johari nerangka, bepelasarka teori ekonomi dikena nyukat pengaya siku-siku orang tauka kompeni, pekara nya mesti bemalinka Aset Ketara Bersih (NTA).
“Enti sida bisi tanah, nya ukai aset? Ba ditu mayuh Tanah Hak Adat Bumiputera (NCR) ke ulih dikemansangka sida nengah pengawa betanam betupi.
“Berebak ari nya, sida enda ulih diengkah ba kategori seranta laban enti seranta sida lepi sereta nadai pemakai,” ku iya.
Iya endang meri perati senentang isu penyeranta ke ngaul rayat laban nya bisi kait enggau pengawa numbuhka polisi pemansang sereta perambu bukai ba nengeri tu.
‘Nengah chara nya perintah ulih ngelangkar mayuh macham polisi ke ulih mutarka isu nya,” tandu iya. – TVS
