SIBU, 17 Nov: “Kitai indu patut ransing nitihka singkang orang ke udah mujur,”, pia ku Debby Lenggang meransang raban orang indu lebih agi indai tunggal awakka ransing agi nyapai pemujur ba pengawa dagang.
Iya ke mega pemenggi Premis Bibi Unisex Hair Salon madahka, jaku peransang nya nyadika tengau pejalai iya dalam ngerandang pemujur ba pengawa dagang dalam bidang penganta.
Ngelansa pasal jerita pengidup iya sepemanjai ngaul diri ba pengawa dagang bidang penganta tu, iya madah semak 24 taun iya udah ngaul diri ba pengawa tu lalu mayuh macham pemar udah diasaika iya.
Nya alai, Debby madah siti chara dikena raban indu ngemansangka pengidup diri iya nya mesti berani masuk pengawa dagang laban nya ulih mantu ngasilka penatai pemisi ngagai ruang bilik.
Taja pia, genap pekara ke deka digaga patut dikereja enggau pengeliat ati, ngembuan pengerindu sereta berani ngerebut peluang ke bisi ti disediaka.
“Pemar sigi mayuh tang kitai patut nemu nama batang pengawa ke patut digaga dikena ngemansangka diri.
“Aku milih salon tu laban udah nyadi pengawa ke dikerindu aku ari suba baka bidang penganta, ngaga buk enggau ke bukai. Nya kebuah aku muka kedai salon,” ku iya lebuh dirandau pemberita TVS.
Ba awak ke sama, Debby meransang raban indu Dayak patut regas negapka pengelandik diri enggau mayuh ngambi ulih nitihka singkang indu bansa bukai ke udah mujur.
“Mayuh pengelebih kitai ngaul diri ba pengawa dagang tu baka kitai ke indu tu, patut titih bansa bukai ba pengawa bedagang,”ku iya.
Tu senutuk bendar enggau pugu manifesto perintah Gabungan Parti Sarawak (GPS) ti deka ngemayuhka penyampau orang indu ba pemansang Sarawak lebih agi ba pengawa dagang.
“Nya kebuah suba kami bisi ngulu kus, tetiap kus nya aku sigi bisi enggau belama laban deka belajar ngulihka penemu,” ku iya.
Pia mega, iya bisi meransang orang indu lebih agi komuniti Dayak patut liat ati belajar nambahka penemu enggau negapka pengelandik diri ba bidang ke dikerindu diri nengah kus, program tauka latih ti disediaka perintah ungkup raban indu.
Tu senutuk enggau pugu manifesto perintah GPS ti deka ngerembaika penyampau orang indu ba pemansang Sarawak baka pengawa dagang.
“Tu lalau aku, kita indu ke nadai sekula, nadai pemandai endar, ulih belajar baru laban tu nguna pengelandik tang mesti ngembuan pengerindu ukai ngumbai enda pedis tang kitai patut belajar nitihka chara orang ke pandai.
“Kitai enda tau enda mantaika pengulih diri. Baka nya ba aku ngambika kitai nyamai ngiga belanja ungkup diri empu,” ku iya.
Ku Debby nambah, siti palan khas ungkup indu Muslim beguntin buk mega bisi disediaka ba salon iya.
“Kami ditu bisi bilik khas ungkup indu Muslim laban ba belakang nyin kami bisi endur khas ngagai sida ti betudung, enda ulih peda orang luar, nya mih penyelai ke bisi ba salon tu ari ke bukai,”ku iya.
Nangkankanya, Debby mega bisi ngeluarka produk The B Nest ari sarang burung lelayang.
Produk The B Nest nadai ngundan kimia, perengka champur enggau original nguna penuh sarang burung lelayang ti ditemu selamat diirup. Ku iya madah, produk tu manah ungkup pengerai kulit sereta ke pengerai tubuh.
Taja agi baru, tang produk The B nest nerima peminta ke tinggi ari peranak menua tu.-TVS
