KUCHING, 17 Nov: Chairman Gabungan Parti Sarawak (GPS) Datuk Patinggi Tan Sri Abang Johari Tun Openg ngelalau pengari rayat ke dipilih ila (ba PRU-15) patut regas betemu enggau rayat sereta meri servis pemadu manah ngagai rayat mayuh.
Ku iya kaban Parlimen ti dipilih patut ngembuan ulah ti ngemeratka menua sereta ngintu pengelantang rayat, ukai semina ngerunding diri empu aja.
Ku iya, pengari rayat ti dichiri patut bejalaika tanggungpengawa enggau naka pemanah sereta meri servis ti pemadu manah ngagai menua kelebih agi ngagai rayat.
“Pengundi ngarapka kitai enda bechiping ati ngagai sida ke udah ngundi kitai. Nyangka sida agi ringat ketegal ulah sekeda kaban politik ti merejuk parti. Sida enda lantang ati laban sida ngundi parti bukai tang pengari rayat ke dipilih nyau nyadi ‘katak’, merejuk parti,” ku iya.
“Pekara tu ngasuh pengundi ringat lalu enda pechayaka chalun nya agi,” ku iya madah lebuh bejaku ba program randau ‘UntukMu Malaysia’ ti dipancharka terus ari RTM ba Auditorium P.Ramlee, malam kemari.
Nangkanka nya iya mega meri besai terima kasih ngagai Menteri ba Opis Menteri Besai (Parlimen enggau Undang-Undang), Datuk Seri Wan Junaidi Tuanku Jaafar laban ke udah mantaika Akta Mali Merejuk Parti.
Iya nyemetak madahka Kunsil Nengeri (DUN) Sarawak deka bejuraika senentang Ubah Rang Undang-undang (RUU) Mali Merejuk Parti dikena nyeliahka ulah kaban parti politik merejuk parti sepeneka ati.
Kelimpah ari nya ku iya madah agi pengawa bejuraika pekara tu deka diatur ba Aum Kunsil Nengeri (DUN) Sarawak ke deka berengkah kena 21 November tu. – TVS
