KUCHING, 17 Nov: Premier Sarawak Datuk Patinggi Tan Sri Abang Johari Tun Openg beniat deka nyendiaka pelajar pechuma ba renggat pelajar tinggi dikena mantu rayat Sarawak ke kurang penatai pemisi.
Kenu ku iya, dikena ngemujurka langgur penemu nya perintah Sarawak patut ngasilka penatai pemisi tinggi nengah bemacham strategi nyengkaum numbuhka belanja pesaka bansa pengudah iya dikemendar ba Kunsil Negeri.
“Tu deka nyadi siti pengawa beranakka puku ungkup jemah ila lalu enti kitai ngembuan penatai pemisi ke manah nyadi nya deka dikena ngatur universiti-universiti peribit,” ku iya nengah program randau ‘UntukMu Malaysia’ dikeluarka RTM di Auditorium P.Ramlee ditu, kemari.
Ku iya, universiti-universiti peribit tu deka nerima pemeri belanja ari perintah Sarawak dikena sida ngatur universiti enggau meri pelajar pechuma ngagai anak Sarawak.
Iya ngarapka langgur nya ulih dipejalaika sebedau 2030.
Universiti-universiti peribit tu mungkur Universiti Teknologi Curtin, Kampus Sarawak di Miri; Universiti Teknologi Swinburne, Kampus Sarawak di Kuching; Universiti Teknologi Sarawak di Sibu; enggau Palan Pasca Siswazah ba Palan Pengelati Teknikal Sarawak (Centex) di Kuching.
Abang Johari madah, naka tu perintah Sarawak nyendiaka sekularship enggau mega jali nengah Yayasan Sarawak.
Berebak enggau nya, Abang Johari bisi madah perintah Sarawak nguna belanja sepenyampau RM 6.7 bilion dikena ngelempungka tating belanja rayat ke tebunsa ketegal pandemik COVID-19 kenyau 2020 nyentuk diatu.
“Pengawa Sarawak nuntut baru hak bekaul enggau asil minyak enggau gas nyapai pemujur lebuh Petronas nyerahka chek bayar Cukai Jual Nengeri (SST) ngagai perintah nengeri.
“Asil ari chukai nya, mayuh projek pemansang ke pemaik engau ungkup pengelantang rayat ulih digaga ba nengeri tu, nyengkaum meri vaksin bebala mayuh ba serata nengeri,” ku iya.
Tandu iya, Kort Tinggi Kuching taun 2020 ngaga pemutus Sabah enggau Sarawak ngembuan hak dibaruh Kunstitusyen Perintah Besai ngeletak chukai jual ngagai produk petroleum di nengeri tu. – TVS
