KAPIT, 16 Nov: Menteri Industri Pemakai, Komoditi enggau Pemansang Kandang Menua, Dato Sri Dr Stephen Rundi Utom meransang sereta ngelalau peranak rumah panjai ke ngaul diri ba pengawa betanam betupi patut berubah ngagai chara nguna teknologi ke baru ba pengawa nya.
Ku iya madah, chara ke baru tu ulih nyungkak agi asil betanam betupi peranak di rumah panjai nyentukka ulih dijual makit ke lebih besai.
“Nyadi, tuju pejalai aku ngagai rumah panjai deka madahka ngagai peranak ba dia senentang chara ngubah ekonomi sida awakka lebih manah agi. Berindik ari nya, aku ngelalau peranak awakka ngubah chara sida betanam betupi iya nya ngena teknologi kemaya hari tu sereta chara ke baru.
“Ambika banding di Kapit ditu utai tanam baka Dabai sereta asil sungai baka Empurau endang nyamai sereta endang udah tebilang. Nya kebuah peranak ditu mesti belematika gaya tanah enggau chara ke engkeman neruska pengawa nya awakka chara ti betul tu ulih mantu sida nambahka penatai pemisi diri.
“Diatu udah semak pasar, lebih kurang 20 minit udah datai di Pasar Kapit ke alai peranak di rumah panjai ulih mai asil kampung enggau sungai ke makit dia,” ku iya madah rambau Program Tuai Begulai enggau Rayat di Rumah Manok Manchal, Yong ditu, kemari.
Nangkanka nya, iya madahka opis menteri iya deka chakah agi nyendiaka bantu, kus enggau program ke patut dikena mantu raban pekebun nyungkak asil utai tanam sida ngambika ulih dikomersialka ngagai makit ke lebih besai.
“Ila kitai bisi Agro Food Terminal ke alai semua utai ke dijual engkah ba siti endur baka pasar borong nya. Udahnya mayuh agi ila baru kitai ngagai CPPC (Collection Processing and Packaging Centre) awakka orang ke ngereja tu endang bisi pengelandik, pemeranak puku enggau orang ke bejual ti tau numbuhka siti industri baru. Orang ke nanam, deka neruska pengawa nanam lalu orang ke bejual deka neruska pengawa bejual.
“Tu meh tanggungpengawa ba opsi menteri ti deka ngemansangka industri pemakai sereta nentuka pengelikun pemakai. Nya alai lebuh nemuai ngagai rumah panjai tu aku mai raban ari opis betanam betupi awakka ulih berati nama utai ulih dikemansangka ditu lalu nama chara ke patut dipejalaika.” ku iya.
Ba program nya, Rundi bisi ngangihka belanja sepenyampau RM30,000 dikena ngaga jalai ba mua kaki lima rumah panjai Manok Manchal Yong Kapit lalu Kaban Kunsil Nengeri (ADUN) Bukit Goram Jefferson Jamit Unyat mega bisi ngagihka belanja RM20,000 ungkup tuju ke sama.-TVS
