Mukah, 15 Nov: Raban polis deka bejalaika nyaga sekeda arung jalai dikena ngurangka penyekut jalai raya maya hari ngundi, 19 November tu.
Tuai Polis Pelilih Menua Mukah Deputi Superintenden Muhamad Rizal Alias ke madah, pengelikun bala pengundi deka dijaga enggu manah.
Nya alai, iya nesau bala pengundi ba sitak Parlimen Mukah ngambi bela sampal anang kakang nurun bejalaika tanggung pengawa diri nyadi pengundi.
Ngelansa pasal proses ngundi tumu, iya dirandau pengudah bejalaika pengawa ngundi di Dewan Serbaguna, Opis Pelilih Menua Mukah sehari tu, madahka bisi 202 raban enggau pemesai Polis udah bejalaika tanggungpengawa sida.
Penyampau nya nyengkaum 73 raban enggau pemesai ba baruh sitak Kunsil Nengeri (DUN ) Dalat, 123 iku orang di DUN Tellian enggau enam agi di DUN Balingian.
“ Proses bejalaika pengawa ngundi tumu di sitak Parlimen Mukah bejalai enggau lanchar lalu nadai sebarang penanggul ari ulah ke dipelabaka deka ngeruga pengelikun mensia mayuh,” ku iya.
Komiti Pengawa Bepilih (SPR) udah netapka hari ngundi Pengawa Bepilih Besai ke- 15 (PRU-15) kena 19 November tu. – TVS
