SIBU, 14 Nov: Sapit Premier Sarawak, Datuk Amar Douglas Uggah Embas merambu deka numbuhka siti komiti khas dikena nyendiaka bantu sereta mutarka sekeda isu ke ditapi pengundi Iban ba menua pesisir ke mendam di sitak Parlimen Sibu.
Naka ke diatu pengundi menua pesisir ba Sibu benung napi mayuh macham penanggul, tang nadai sapa datai mutarka penanggul nya.
“Endang siti ari pengarap aku ngambika komiti tu ulih ditumbuhka pengudah pengawa bepilih besai Parlimen tu.
“Pengundi ba menua pesisir ba sitak tu napi mayuh penanggul tang nadai siku ngerandang jalai sida ngulihka bantu ke patut,” ku iya madah pengudah program betemu rayat di Rumah Salim Unang ba Sungai Rasau, Sibu lebuh Hari Minggu.
Beduduk ari nya, iya madah, naka ke diatu komiti nya diberi nama Komiti PBB Bawang Assan.
Uggah ke mega Menteri Infrastrakcha enggau Pemansang Penyangkai Kapal nerangka, pemisi komiti nya ngemudahka aum diatur dikena mutarka isu ke ditapi seraya ulih beratika peminta ti diguna rayat ba menua pesisir.
“Aku deka betemu enggau Premier Sarawak, Datuk Patinggi Tan Sri Abang Johari Tun Openg baum senentang pekara tu,” ku iya.
Ku iya, pengelama 12 taun pengudah DAP nguasa kerusi Parlimen Sibu, peranak ba dia napi mayuh penanggul, lebih agi ari sukut pemansang infrastrakcha enggau utiliti.
“Sida nadai jalai ke manah ditengah lebuh nurun ke pasar Sibu, sekeda rumah panjai bedau disikap bekal ai beresi, nadai klinik pengerai ke semak genturung pendiau enggau ke bukai.
“Nya kebuah aku ngelalau sida nurun ngundi kena 19 November tu sereta awakka ulih ngasaika ubah pemansang. Kita mesti ngudi chalun Gabungan Parti Sarawak (GPS) Clarence Ting ari SUPP.
“Enti sema iya (Clarence Ting) menang rambau PRU Ke-15 tu iya deka nyadi jematan ke beguna ungkup rayat ngagai perintah,” ku Uggah madah agi.
Bepelasarka rikod, pengundi Dayak kira-kira 30 peratus ari kira-kira 100,000 iku pengundi di Sibu. – TVS
