KUCHING, 14 Nov: Tiga menyanak nyengkaum ex-Sekretari Mendam Opis Menteri Pemansang Rama enggau Urbanisasi (KPSU), Affandi Keli entara ti bebadi nyawa ba sebengkah penusah angus ke nyadi ba Lorong Bunga Tongkeng Kampung Gita, malam tadi.
Dua agi tudah ke bebadi nyawa iya nya anak Affandi, Aneeqa Pandi, 35, enggau anak menyadi iya, Nor Hasyidah Ajis, 22.
Semua sida tu tepekul dalam rumah dua ringkat sereta dikenuku bebadi nyawa ketegal sendat seput.
Pengari Palan Operasyen Bomba Sarawak madah raban sida nerima kangau tasah urung pukul 7.03 malam bekaul enggau penusah nya.
Bekau ari nya, dua raban bomba digerah ngesah palan penusah ngaul raban ari Balai Bomba enggau Penyah Penusah (BBP) Petrajaya enggau Batu Lintang.
Penusah tu mega ngujungka lima buah kerita angus lalu pengawa ngerara api tembu pukul 11 malam.
Berebak enggau nya, Direktor Opis Bomba enggau Penyah Penusah Malaysia Nengeri Sarawak Datu Khirudin Drahman madah, pansik benung dipejalaika nyidi kebuah penusah nya nyadi.
“Unit K9 Bomba enggau Forensik datai bejalaika pansik ba palan penusah nyadi,” ku iya maya dirandau TVS malam tadi.
Sama datai ngesah palan penusah tu iya nya Menteri Kanan Kereja Raya Dato Sri Fadillah Yusof. – TVS
