SARATOK, 12 Nov: Gaya kimpin nyerumba Pengawa Bepilih Besai Ke-15 (PRU-15) di Parlimen Saratok lanchar lalu semua chalun parti ti betanding naka ulih bejalaika kimpin diri ngaul rayat di sitak nya.
Ku Direktor PRU-15 Gabungan Parti Sarawak (GPS) Parlimen Saratok Friday Belik, urung 40 peratus genturung pendiau di sitak nya ulih dilawa raban komiti GPS.
“Naka tu, kimpin ari chalun GPS, Giendam Jonathan Tait nerima timbal ke manah ari pengundi.
“Lebih kurang seminggu kitai bekimpin mantu ngangkatka chalun GPS, lebih agi nerima sukung ari Presiden Parti Demokratik Progesif (PDP) empu, Dato Sri Tiong King Sing enggau Kaban Kunsil Nengeri (ADUN) Marudi Datuk Dr Penguang Manggil ti ngujungka bala pengundi kitai meri timbal ke manah,” ku iya rambau ditanya pemberita pengudah bejadika Program Lumba Ninting Taun SK Ulu Sebetan di Stadium Saratok ensanus.
Berebak ari nya, Friday ke mega Kaban Kunsil Nengeri (ADUN) Krian nerangka, semua chalun ke betanding dipeda bebasaka pangan diri sereta meransangka pengundi meri sukung ti rat ngagai chalun GPS ngambika Saratok ulih terus dikemansangka.
Beserimbai enggau hari ngundi ke deka diatur kena 19 November tu, iya nangkan bala pengundi ba Saratok nurun tumu ngagai palan ngundi, bela bejalaika hak sereta tanggungpengawa milih pengari rayat.
“Aku minta semua pengundi ba Saratok bela tumu nurun maya hari ngundi laban kitai nangika gaya hari ke ulih berubah sebarang maya.
‘Enti sema kitai laun datai peluang kitai deka ngundi ulih puntan. Nyadi aku ngelalau semua kita mesti datai tumu sereta seruran nyikap diri napi gaya hari ke enda manah,” ku iya.
Iya madah, naka tu nadai isu tauka pekara enda disadang nyadi sekumbang kimpin PRU-15 dipejalaika ba Saratok.
Parlimen P.205 Saratok serak tu ngemataka chalun GPS, Giendam Jonathan Tait deka nguji ngerampas penuduk sitak nya ari penyandang, Datuk Ali Biju (PN), sereta siku agi chalun ke bela nguji nasip diri iya nya Ibil Jaya Mundat (PKR). – TVS
