KUCHING, 12 Nov: Perintah nengeri ba baruh iring Gabungan Parti Sarawak (GPS) ngamatka danji ke udah disemaya rambau Pengawa Bepilih Nengeri Ke-12 (PRN-12) sebedau tu nengah pengawa numbuhka Turu Reta Pesaka Bansa.
Premier Sarawak, Datuk Patinggi Tan Sri Abang Johari Tun Openg madah, naka ke diatu pengawa numbuhka turu nya udah ba renggat kepenudi laban undang-undang ke bekaul deka dibantaika maya aum Kunsil Nengeri (DUN) ti deka diatur ba bulan tu.
“GPS udah ngamatka danji, enda baka orang bukai ke udah besemaya, tang semina balang enda nyadi.
“Beduduk ari nya, aku ngelalau rayat ba Samarahan, mesti semampai bejejaga lebuh nerima tauka ninga danji ari sekeda orang. Enti ulih kitai enggai pisang bebuah dua kali,” ku iya rambau bejaku ba Program Makai Lemai Beserimbai enggau Aniversari Taun Keenam Kaunsil Mengeri Kota Samarahan (MPKS), lebuh Hari Lima.
Temuai bukai ke bisi ngulu program nya, Menteri Dagang Temuai, Industri Kreatif enggau Seni Pemerindang Sarawak, Dato Sri Abdul Karim Rahman Hamzah, Sapit Menteri Infrastrakcha enggau Pemansang Penyangkai Kapal Sarawak, Ir. Aidel Lariwoo, Kaban Kunsil Nengeri (ADUN) Simunjan, Awla Dris sereta Chairman Kaunsil Mengeri Kota Samarahan (MPKS), Dato Peter Minos.
Sebedau tu, Abang Johari madah, perintah nengeri deka numbuhka Turu Reta Pesaka Bansa nengah chara beratika enggau mansik pengawa pengatur ti dipejalaika menua Norway, Singapura sereta United Kingdom.
Iya nerangka, tuju penumbuh turu nya dikena nentuka pengidup raban nembiak rebak dudi menyana seraya nyamin penegap asil nengeri Sarawak ungkup pemansang jemah ila.
Ku Abang Johari, GPS udah ngamatka danji lebuh ngemansangka Kota Samarahan.
“Pekara tu ulih dipeda nengah pemansang ke udah diasaika peranak ba Kota Samarahan nengah penumbuh Ejensi Pemansang Begulai Kandang Menua (IRSDA) ti mega entara danji GPS.
“Aku mega kala besemaya deka numbuhka IRSDA rambau Program Aniversari MPKS, dua taun ke udah sereta tu mandangka GPS endang bepegai teguh ba danji,” ku iya. – TVS
