BETONG, 12 Nov: Chalun ari parti politik ke betanding rambau Pengawa Bepilih Besai Ke-15 (PRU-15) bela dilalau anang ngangaika isu ngaul raban bansa, lebih agi maya bekimpin.
Sapit Menteri Pemansang Orang Indu, Nembiak Mit enggau Pengelantang Komuniti, Mohd Razi Sitam madah, pekara nya patut dipereti dikena nyamin pengelantang, kaul ti manah sereta penegap penyerakup rayat pupu bansa lebih agi ba sitak Parlimen Betong.
“Aku sigi enda setuju enti sema bisi chalun ari parti penyakal di Sitak Kunsil Nengeri (DUN) Saribas ngangkaika isu baka nya maya bekimpin.
“Politik kitai ba Sarawak enda dibalut isu ngaul raban bansa, tebal agi parti Gabungan Parti Sarawak (GPS) ditumbuhka ari parti kompenan ti ukai semina ari siti bansa tang mungkur semua pupu bansa ke bisi di Sarawak,” ku iya madah rambau ditanya pemberita pengudah ngulu Program Latih enggau Simulasyen Tasah Palan Pengenduh Sementara (PPS) Renggat Bagi Menua Betong di Dewan Millinea, Debak ensanus.
Mohd Razi ke mega Kaban Kunsil Nengeri (ADUN) Saribas nerangka, gaya politik ti enda manah baka petenah, mai isu ngaul raban bansa enggau nguji ngeruga penyerakup rayat Sarawak endang ditulak sereta enda dikelaluka di nengeri tu.
Ba pengerembai bukai, rambau ditanya senentang penyampau pengundi ke deka ngundi kena 19 November tu, Mohd Razi madah, lebih ari 70 peratus pengundi disaran pansut ngundi di DUN Saribas.
“Penyampau pengundi kitai ba DUN Saribas diatu iya nya 16, 419 iku pengundi, bisi nambah semak 5,000 iku enggau penyampau semua pengundi di Parlimen Betong bisi 41,000 lebih iku. Kitai nyaran 70 nyentuk 80 peratus nurun ngundi,” ku iya madah agi.
Iya mega meransang pengundi biak bela nurun ngundi dikena nentuka sida milih pengari rayat ke ulih dikearapka mai pemansang.
Chalun GPS ti bediri ba Parlimen Betong serak tu iya nya Dr Richard Rapu@ Aman Begri, ngelaban dua iku agi chalun iya nya Patrick Kamis ari Pakatan Harapan (PH) enggau Hasbie Satar (Bibas). – TVS
