KAPIT, 10 Nov: Tuai rumah mesti bejalaika tangkup pengawa ngenataika penanggul ke ditapi komuniti ngagai pengari rayat tauka opis perintah ngambika tetiap program enggau projek pemansang bejalai lanchar.
Sekretari Besai Gabungan Parti Sarawak (GPS), Dato Sri Alexander Nanta Linggi madah, pengari rayat enggau opis perintah enda ulih matau semua penanggul ke nuntung rayat.
“Tuai rumah nyadi ejen perintah bekunsika penerang senentang penanggul ti ditapi rayat sereta pekara bukai ke beguna ungkup pemaik rayat,” ku iya madah rambau program bejadika Aum Besai Kedua Gerempung Penghulu enggau Tuai Rumah Pelilih Song lebuh Hari Tiga.
Nanta ke mega chalun Gabungan Parti Sarawak (GPS) Parlimen Kapit nerangka, Tuai Raban Bansa enggau Tuai Rumah (KMKK) mesti meretika polisi enggau program pemansang ke dibai perintah awakka mudah maya sida meri penerang ngagai rayat, lebih agi ba rumah panjai enggau genturung pendiau diri.
“Aku sigi meransang gerempung tu ulih ngatur lebih mayuh kus ti bekaul enggau atur, prosedur, polisi baru ke tau mantu nambahka penau penemu sida,” ku iya.
Ngelansa pekara bukai, Nanta madah, Gabungan Parti Sarawak (GPS) sedia bekerejasama enggau parti politik bukai ti ulih numbuhka perintah ke tegap pengudah Pengawa Bepilih Besai Ke-15 (PRU-15).
“Sapa bagi sida ke deka bekerejasama enggau kitai numbuhka perintah, kitai sama nganti pengudah pemutus PRU-15 tu.
“Pekara ti dikemeratka diatu iya nya kerejasama ke manah dikena nentuka menua enggau Sarawak terus mansang sereta ngatur menua nengah chara ke lurus,” ku iya madah agi.
Ungkup PRU-15 serak tu, GPS betanding ba semua 31 kerusi Parlimen di Sarawak seraya ngirai 14 iku chalun baru. – TVS
