KUCHING , 10 Nov : Sarawak Digital Economic Corporation (SDEC) , nengah siti anak serikat SDEC iya nya SDEC Energy Sdn Bhd bisi minta ngagai perintah diaku nyadi sebuah serikat minyak senutuk enggau pekara dalam Sempekat Malaysia 1963 (MA63).
Kebuah pia, ku Menteri Dagang Dalam Menua enggau Pekara Bebelika Barang (KPDNHEP) Dato Sri Alexander Nanta Linggi laban serikat nya deka sama tikas baka serikat minyak ke udah tampak nama baka Petronas, Cartel enggau ke bukai.
Iya mansutka pekara nya rambau dirandau pengari TVS dalam Program Sejahtera Asia bedau lama ke udah.
Nangkan ke nya, Nanta madah bisi sekeda Opis Menteri enda berapa setuju enggau peminta tu.
“Engka bisi sekeda Opis Menteri enda tentu setuju enggau peminta tu ngambi peminta tu dikemendar tang laban aku anak Sarawak, pekara tu ulih dikemujur nengah Opis Menteri aku tu siti ari tanggungpengawa aku,” ku iya.
“ Ba runding aku sereta Opis Menteri aku, peminta Sarawak endang patut diberi pemendar ngambika serikat tu ulih nyadi sebuah serikat ke ulih ngarika Perintah Sarawak ke alai Sarawak tu sebuah nengeri ti mansutka mayuh minyak enggau gis lalu kitai mega patut diberi peluang ngambika bisi ngembuan sebuah serikat minyak baka tu”, ku tandu iya.
Ungkup penemu, pekara tu bisi dibantaika dalam pugu manifesto Gabungan Parti Sarawak (GPS) ungkup PRU-15 iya nya deka terus ngetanka hak Sarawak dalam serakup Malaysia senutuk enggau MA63, Ripot IGC enggau Kunstitusyen Sarawak sereta Kunstitusyen Perintah Besai. – TVS
