KUCHING, 10 Nov: Chalun Gabungan Parti Sarawak (GPS) Parlimen Petra Jaya Dato Sri Fadillah Yusof madah, Premier Sarawak Datuk Patinggi Tan Sri Abang Johari Tun Openg udah bejalaika mayuh macham inisiatif dikena mantu rayat nyengkaum raban nembiak di nengeri tu.
Ku iya, nya entara kebuah rayat pupu bansa meri timbal ke manah ngagai GPS ngambi terus ngiring Sarawak.
“Aku udah ngelawa lebih 100 buah kedai ba Jalai Nanas enggau komuniti Cina ba dia ngelaluka penatai kami, sida nerima manah GPS.
“Beduduk ari nya, aku pechaya Premier kitai udah mujur bejalaika pengawa iya lebih agi mantu rayat nengah Strategi Pemansang Pasca Covid-19 (PCDS) 2030. Nya kebuah, aku pechaya rayat seruran meri sukung ti rat ngagai GPS,” ku iya rambau ditanya raban media ba program Juh Berekot dengan FY di Pustaka Negeri Sarawak lebuh Hari Tiga.
Nangkanka nya, Fadillah nerangka, senentang mayuh program ke udah dirintai raban pengawa bepilih iya sepemanjai timpuh bekimpin tu.
Iya madahka, program ti ngaul raban nembiak nerima timbal ke chukup manah, tebal agi sida ke baru nyadi pengundi ba pengawa Bepilih Besai ke-15 (PRU-15).
“Taja pan matak nembiak ngaul diri ba pengawa bepilih tu siti ari pemar ke ditapi, tang naka ke diatu sida pechaya ngagai pemujur GPS.
“Nya entara kebuah, aku deka meri terima kasih ngagai nembiak laban meri sukung ke penuh ngagai kitai.” ku iya.
