MIRI, 9 Nov : Sektor pelajar dalam Strategi Pemansang Pasca Covid-19 (PCDS) 2030 chukup dikemerat dikena ngerembaika penau enggau orang gawa ba bemacham bidang berengkah umur sida agi biak.
Perintah Sarawak deka ngemaruka modal enggau polisi pelajar kediri dikena meri pelajar ke lebih bekualiti ngagai rebak diatu enggau dudi hari.
Premier Sarawak, Datuk Patinggi Tan Sri Abang Johari Tun Openg madah, pekara dikearapka iya nya deka ngemansangka mayuh agi penau di Sarawak dalam nempa Sarawak nyadi nengeri maju manggai taun 2030.
“Baka ke udah ditemu, Sarawak ngembuan polisi timpuh panjai dibaruh PCDS 2030. Siti ari sektor ke beguna iya nya pekara pelajar laban kitai deka nempa mayuh agi orang landik ari raban rayat Sarawak.
“Pemansang penau chukup beguna laban nya endang atur dikena kitai ngemansangka Sarawak lalu nya seriris enggau juluk kitai nyadi menua maju, taun 2030. Kitai meri bantu enggau ngemeratka pekara pelajar,” ku iya maya bejadika Pegerami Muka Riam Hill International Secondary School ditu, kemari.
Kenu ku iya, pemansang penau tu beguna amat dikena nempa pengereja pengawa ke baru beduduk ari ekonomi dunya diatu ke majak berubah ketegal ubah gaya hari.
“Ba penemu aku nama utai ke beguna iya nya ngerembaika penau kitai. Kitai diatu benung ngalih ngagai ekonomi dunya laban ubah gaya hari enggau kitai chukup benasip manah laban ngembuan penatai pemisi.
“Kitai ngembuan pekara ke dikumbai ekonomi gadung. Kitai mega bisi ai lalu semina kitai aja ngena ai dikena ngasilka hidrogen enggau oksigen.
“Diatu kitai benung nempa proses, inovasyen enggau misahka hidrogen enggau oksigen nengah membran baru ti begunaka kuasa karan ke kurang,” ku iya.
Beratika pekara nya, Perintah Sarawak sedar pemesai guna subjek pelajar sains baka biokimia ungkup nembiik ba Sarawak ngambika sida nyukung pengawa ngasilka produk baru ari gas, amomia enggau ke bukai ungkup pemaik Sarawak jemah ila.
Premier Sarawak pechaya Riam Hill International Secondary School ulih ngasilka bala nembiak ke bepelajar tinggi sereta deka nyaup ngemansangka nengeri Sarawak.
Pekara tu beduduk ari penumbuh sekula entarabansa baka Riam Hill International Secondary School ngena silibus belajar ari Cambridge sereta udah diaku ba serata dunya kelimpah peluang ngagai nembiak ke graduet ba palan tu belajar ngagai tikas ke lebih tinggi.
Perintah Sarawak mega deka nambahka mayuh agi sekula entarabansa ke ulih ditangkup pupu bansa enda ngira ari penatai enggau pendiau sida lalu belanja apai indai enda ngira pendiau enggau penatai pemisi ngambika sida enda pambar maya begunaka penemu enggau penatai pemisi diri sebilik ngambika sida bepeluang nuntut penemu sereta ngasaika pengidup dudi hari ke lebih nyamai. – TVS
