KUCHING, 8 Nov: Kakang ati milih entara ‘lokal’ tauka ‘import’ ukai semina nyadi maya meda sesebengkah produk tang mega berupai nyadi ba kelang politik Sarawak.
Tanda tanya sekalika milih parti dalam menua ke dipeda nyadi ‘bujang berani’ negika hak Sarawak dibanding parti nasional enggau telah ‘semenanjung’ entara ‘buah mulut’ politik di Bumi Kenyalang nyerumba Pengawa Bepilih Besai Ke-15 (PRU15).
Landskap politik Sarawak diatu ngayanka rintai parti ke mai identiti menua baka Gabungan Parti Sarawak (GPS), kelimpah parti dalam menua ke bukai baka Parti Sarawak Bersatu (PSB), Parti Bumi Kenyalang (PBK) enggau Parti Bansa Dayak Sarawak (PBDS).
GPS iya nya gempung Parti Pesaka Bumiputera Bersatu (PBB), Parti Rakyat Bersatu Sarawak (SUPP), Parti Rakyat Sarawak (PRS) enggau Parti Demokratik Progresif (PDP) ke sebedau tu nyadi kaban Barisan Nasional (BN) sebedau sida madah diri pansut ari gempung nya kena June 2018.
Bela ngambi bagi bediri minta pilih ba Sarawak iya nya parti-parti nasional baka DAP, PKR enggau Amanah dibaruh gempung Pakatan Harapan (PH) baka parti PAS enggau Bersatu dibaruh Perikatan Nasional (PN), berebak enggau nya BN ngaga penetap enda bediri minta pilih ba nengeri tu.
Kenu ku Profesor Sains Politik Universiti Putra Malaysia (UPM) Prof Datuk Dr Jayum Jawan, naratif identiti endang beguna dalam landskap politik Sarawak, tang rikod japai dikena negika hak Sarawak deka nyadi penentu besai ungkup pengundi ngaga pilih.
“Di Sarawak, parti-parti dalam menua tu dipeda negika hak Sarawak laban sida chukup gagit ba pekara nya. Parti nasional enggau ari semenanjung dipeda enda baka nya,” ku iya madah ngagai Bernama apin lama ke udah.
Jayum madah, pengulih parti ari Semenanjung Malaysia baka DAP enggau PKR naka tu enda berapa ngemantup ati taja udah lama masuk Bumi Kenyalang kenyau beberapa taun ke udah.
“Taja PKR udah nyiri sekeda peranak menua tu ngiring parti nya ba renggat Sarawak sereta nasional tang semua nya enda ulih dikena ngangkatka PKR ngagai tikas ke lebih manah ari sukut bekuasa ba Sarawak.
“DAP sebedau tu endang bulih sukung tang ba Pengawa Bepilih Besai (PRN) kena Disember taun nyin kemari, sukung ari komuniti China dipeda ngalih ngagai Parti Rakyat Bersatu Sarawak (SUPP), tang sida dipeda agi ulih ngelaban ba sitak mengeri besai ba Sarawak,” ku iya.
Ngelansa pasal penumbuh perintah besai, Jayum madah penyampau 31 penuduk Parlimen di Sarawak nyangka ulih ngasuh parti dalam menua baka GPS numbuhka Perintah Besai kediri, tang penyampau nya ulih nyadi penentu, bepangai ba jari sida.
“Nyema sebedau tu, GPS deka milih bakih (ba renggat nasional) sebedau besatup tang serak tu sida milih besatup dulu lalu udah nya ngiga bakih ke menang enggau meri pakej ke pemadu manah ngagai sida,” ku iya.-TVS
