KUCHING : Serakup Pengajar Sarawak (STU) nyukung penuh perambu Kongres Serakup Pengereja Pengawa Dalam Servis Perintah (Ceupacs) ti deka minta kemisi hari besai kena 18 November 2022 iya nya sehari sebedau nurun ngundi.
Presiden STU, Kullin Djayang setuju enggau perambu nya laban bejalaika pengawa ngundi endang pekara ke chukup besai reti enggau nya endang hak nyadi rayat ngagai menua tu ngemeranka atur demokrasi baka Malaysia.
“Di Sarawak kemisi hari besai kena 18 November tu chukup beguna laban pendiau geografi enggau mayuh pengajar ke gawa jauh ba ari palan ngundi.
“Kekadang bisi raban pengajar ngambi awak ke lama endur mulaika diri ngundi sereta pulai baru ngagai palan ke gawa.
“Mayuh sida ke ngajar ba sekula di menua pesisir di Sarawak begunaka awak ke lama endur nurun ngagai stesyen ngundi,” ku iya madah nengah sebengkah penerang sehari tu tadi.
Nangkan ke nya, Kullin madah bisi mega pengajar diau ba bagi menua bukai lalu ngundi ba endur bukai nyengkaum bala pengajar ke diau ba luar Sarawak.
Ku iya, taja pengajar bisi kemisi belelak khas (CRK) tang nya lebih engkeman ungkup guna bukai.
Nya alai, STU ngarapka perambu tu ulih dikemendar laban PRU semuna dipejalaika lima taun sekali.
“Kemisi hari besai kena 18 November tu mega deka ngemuntangka bala pengajar ngatur pejalai nurun ngundi enggau pulai baru ngagai endur ke gawa,” ku iya.
Berebak enggau nya, Presiden STU nya nangkan semua pengajar patut merambu pejalai enggau manah sereta likun. Pejalaika tanggungpengawa enggau hak nyadi pengundi enggau manah, ku iya.
Sebedau tu, nengah sebengkah penerang Presiden Ceupacs, Datuk Adnan Mat madah perintah patut ngerah 18 November nyadi hari besai khas awakka rayat Malaysia nyamai mulaika diri tumu ngagai endur sida ngundi.-TVS
