Rikod asil pengawa pemadu manah GPS

KUCHING : Dalam manifesto GPS ke baru dipenyadika Chairman iya, Datuk Patinggi Abang Johari Tun Openg ba Palan Aum Borneo Kuching (BCCK) malam tadi bisi ngerintaika 15 rikod asil pengawa pemadu manah GPS.

Nyadi entara asil pengawa manah tu iya nya ;

1. Perintah GPS menang 76 ari 82 penuduk DUN ba Pengawa Bepilih Besai Nengeri Ke-12 (PRN-12)ngujungka GPS mujur nuntut 13 Pekara enggau chara atur bekaul hak Sarawak ari Perintah Besai. Tu nyengkaum perambu projek pemansang perintah besai, pangku pengawa staf opis perintah besai, penyampau nembiak Sarawak masuk universiti perintah sereta nguatka pengawa enggau kerejasama Opis Perintah Nengeri enggau Perintah Besai ba Sarawak.

1. GPS mujur mulaika status Sarawak nyadi bakih kunsi sebaka dalam numbuhka Malaysia ba taun 1963.  “Hari Malaysia” mega udah diaku enggau kuasa diberi ngagai Sarawak endur nentuka raban bansa asalnengah ubah Perlembagaan Persekutuan.

1. Ketuai Sarawak dalam Majlis Khas Perjanjian Malaysia (MA63) bela berundingka peminta mulaika 35 % kerusi Parlimen ungkup Sarawak enggau Sabah ke bela disukung penempa undang-undang ari kededua nengeri. Ari segi prinsip atur tu mega disetuju Perintah Besai.

1. Perintah GPS mujur minta wakil Sarawak nyadi kaban direktor Kaunsil Asil Dalam Menua (LHDN) Malaysiati disetuju Perintah Besai ari segi prinsip Sempekat Komersial begulai enggau PETRONAS ngujungka Sarawak ulih chakah dalam industri minyak enggau gas. Chukai Asil Nengeri (SaST) sepenyampau 5 % ba produk petroleum udah nambahka penyampau asil Sarawak ngelui RM10 bilion setaun dikena bejalaika mayuh projek pemansang ba mengeri enggau menua pesisir.

1. Raban orang biak bulih mayuh pemaik laban semua ke dilanggur enggau digaga endang ungkup pengidup sida dudi hari. Entara inisiatif ke benung enggau deka dipejalaika nyengkaum bidang digital enggau teknologi gadung baka kuasa hidrogen enggau pemeruan rampa menua. Pekarapelajar enggau latih teknikal deka terus ditegap dikena ngangkatka penau enggau pengelandik rebak baru dalam mantu ngemansangka Sarawak.

1. GPS terus nyamin hak ngempu tanah adat Bumiputera(NCR), akses ngagai pelajar enggau pengerai sereta mantu semua renggat komuniti ba Sarawak.

1. GPS mujur ngangkatka penegap politik, ekonomi enggau rama ngambika pengawa pemansang ulih diberi perati penuh.

1. Nengah bemacham inisiatif jauh timpai enggau polisi strategik ekonomi, asil enggau penatai pemisi Sarawak ulih ditambah. Ari simpan ke tegap enggau pun penatai pemisi alternatif, Sarawak ulih mantaika bajet pemadu besai ungkup menua tu urung RM10 bilion setaun ungkup tuju pemansang enggau pengelantang pendiau rayat.

1. Perintah GPS mujur bejalaika mayuh program enggau projek pemansang ke meri pengelantang pendiau ngagai rayat. Tu nyengkaum projek infrastruktur,jalai raya, jematan, bekal ai, karan, telekomunikasyen, internet, servis pengerai enggau pelajar sereta pengawa berumah. Pejalai program enggau projek tu terus dikerembai, dikemesai sereta dilengkaska ke pengelantang rayat.

1. Sepenyampau120 inisiatif strategik ke dipeda penuh meri pangka besai bepelasarka prinsip politik ngemeratka guna, pengelantang enggau pengidup jemah rayat Sarawak dipenyadi sereta dipejalaika enggau mujur kenyau 2017.

1. Pengawa pemansang tu ngerichahka aktiviti ekonomi Sarawak sereta nambahka pengandal pemeranak puku luar enggau domestik terus dipejalaika. Pemeranak puku tu udah nyendiaka mayuh peluang gawa enggau bemacham dagang ungkup rayat. Semua tu mujur nyungkak penatai pemisi enggau tikas pengidup rayat.

1. Perintah GPS mujur bejalaika semilan Pakej Bantu Khas Sarawakku Sayang (BKSS) beungkus lebih RM6.7 bilion maya rayat tebunsa ketegal pandemik COVID-19. BKSS meri pemaik besai ngagai rayat Sarawak lalu diatu sida neruska pengidup baka selama.

1. Perintah GPS mantaika Strategi Pemansang Pasca-COVID-19(PCDS) 2030 dikena ngerandang pemansang Sarawak nuju ekonomi maju bepenatai pemisi tinggi. Bemacham inisiatif ti bepelasarka penguntung ekonomi enggau pengelantang rama sereta pemeruan rampa menua dilanggur enggau dikemujur.

1. Bepelasarka prinsip Ngenuluka Sarawak, GPS nyamin pengidup dudi hari Sarawak enggau negapka pekara wang rebak dudi anak Sarawak iya nya numbuhka Turu Pesaka Bansa Sarawak(Sarawak Sovereign Wealth Future Fund).

1. Perintah GPS bebasaka lebas bepengarap enggau adat lama rayat pupu bansa dikena nempa komuniti ti teguh beserakup.-TVS