KUCHING, 7 Nov: Pekara manifesto Pengawa Bepilih Besai Ke-15 (PRU-15) Gabungan Parti Sarawak (GPS) ukai jaku ngapa baka manifesto Pakatan Harapan (PH) sebedau tu.
Chairman GPS, Datuk Patinggi Tan Sri Abang Johari Tun Openg madah, mayuh projek ke ngaul pemansang ba Sarawak dikinsil sekumbang parti nya megai Perintah Besai.
“PH udah nginsil projek di Batang Lupar, Rambungan enggau Igan. Maya GPS ditumbuh, kitai neruska projek nya ngena belanja enggau chara kitai empu.
“Udah nya, kitai deka mantu raban nembiak ba menua pesisir, tang Menteri Pekara Wang (maya nya) madah bayar dulu utang, tang pengudah dibayar, nadai ga pemansang ungkup sekula digaga, tambah mega chukup lubah,” ku iya.
Iya madah munyi nya maya Pengawa Bejadika Manifesto GPS ba Palan Aum Borneo Kuching (BCCK) ditu malam tadi.
Nangkan ke nya, nengah aum pemberita sepengudah pengerami nya, Abang Johari madah, rayat Sarawak patut berundingka pekara ke udah nyadi sekumbang dikuasa PH pengelama 22 bulan, balat amat ngasuh jera.
“Pia mega projek ke udah dikemendarka perintah ke suba sebedau PH maya dibatak.
“Pisang anang bebuah dua kali, kitai patut sedar utai ke udah diasai maya pegai PH suba,” ku iya.-TVS
