KUCHING, 7 Nov : Manifesto Gabungan Parti Sarawak (GPS) ba Pengawa Bepilih Besai Ke-15 (PRU-15) endang bebatang lalu ulih dikeamat nyema diberi rayat mandat mai sada Sarawak ngagai Parlimen.
Mandal Presiden Parti Pesaka Bumiputera Bersatu (PBB), Dato Sri Dr. Stephen Rundi Utom nyemetak madah, pekara nya nyata dipeda sebedau tu ba Pengawa Bepilih Besai Nengeri Sarawak Ke-12 (PRN-12) enggau manifesto ke digaga ba polisi Sarawak lebih agi dalam Strategi Pemansang Pasca Covid-19 (PCDS) 2030.
“Manifesto GPS keterubah iya nya bebatang, kedua iya nya danji ulih digaga kitai lalu ketiga nadai besemaya bulan enggau bintang lalu senang didinga orang.
“Kitai meda 22 bulan danji Pakatan Harapan (PH) nama nyadi ngagai tiga Menteri Besai, sampai sehari tu kitai nadai ulih ngaga nama-nama, nyadi Sarawak mesti nyaga Sarawak lalu nya tanggungpengawa rayat Sarawak nyaga nengeri,” ku iya.
Iya madah munyi nya maya dirandau pemberita ba Pengawa Bejadika Karnival Jalinan Tani 2022 enggau bejadika Palan Latih Pengelandik Betanam Betupi Sarawak (IPS) Semenggok ditu, tadi.
Sama datai Sapit Menteri Industri Pemakai, Komoditi enggau Pemansang Wilayah, Datuk Dr. Abdul Rahman Ismail enggau Maclanie Ben @ Martin Ben, Sekretari Mendam Opis Menteri Industri Pemakai, Komoditi enggau Pemansang Wilayah, Datu Edwin Abit enggau Pemangku Direktor Betanam Betupi Sarawak, Dominic Chunggat.
Iya ke mega Kaban Kunsil Nengeri (ADUN) Kemena ke mega Menteri Industri Pemakai, Komoditi enggau Pemansang Wilayah minta rayat Sarawak patut pintar milih pengari ba PRU-15 lalu ingatka pesan Kepala Menteri ke dulu suba, niang Pehin Sri Tan Sri Adenan Satem ti minta nyaga nengeri tu enggau manah.
“Ingat Tok Nan mesan nyaga Sarawak enggau manah-manah sampai mati, pesan nya mesti dikeingat ukai semina aku tang mega semua kitai,” ku iya.
Ku iya, pesan nya laban iya nemu pekara lebih tejamin nyema rayat Sarawak begempung ati, bekerejasama enggau bebendar nyaga hak Sarawak enggau neruska pemansang.
Chairman GPS ke mega Premier Sarawak, Datuk Patinggi Tan Sri Abang Johari Tun Openg mantaika manifesto GPS berambaika jaku ‘Nyamin Sarawak Tegap, Maju enggau Lantang’ ti mungkur siti kuing tuju, 5 pekara besai, 25 pugu enggau 215 komitmen.-TVS
