KUCHING : Akademi Serakup Dayak Iban Sarawak terus chakah ngetanka ke ngepan Iban ngambika meruan dikena nembiak rebak baru taja pan diatu dunya majak disegang arus pemansang teknologi moden.
Tuai Asadia Mabong Unggang madah, ngambika pengelandik ngaga ngepan asal enda lenyau, dia Asadia udah ngatur kelas ngaga marik empang tauka tangu sereta kelas ngaga kain burie.
“Dua iti ngepan nya endang sigi tebilang sereta begunaka amat ba pengidup bansa Iban.
“Kain burie tu dikena maya bisi pengerami tauka maya Gawai ngambika manding dipeda. Udah nya, tanggu tu siti ari ngepan ke dikena sida ke indu, lebih agi maya ngajat,” ku iya madah nengah sebengkah penerang, empai lama.
Nangkan ke nya, Mabong madah ari pengelandik ngaga tangu mega ulih dikena nusuk marik enggau ngepan bukai ti besangkut paut enggau nusuk marik.
“Ngepan indu enda engkeman enti nadai tangu. Nya alai, pengelandik ngaga tangu nya patut dikemeran sereta dikerembai ngagai nembiak rebak baru,” ku iya.
Kenu Mabong, ungkup kelas ngaga kain burie orang ke udah dikangau ngemujurka kelas tu iya nya Roselind Indo enggay Elizabeth Tara.
Udah nya, orang ke benung ngajar ngaga tanggu jam ke diatu dua iku melaki bini iya nya Diman Simboh enggau Badong Malina.
Ungkup penemu kelas ngaga kain burie tu udah berengkah dipejalaika Asadia berengkah ari pun bulan Oktober nyentuk ngagai November tu lalu kelas ngaga tanggu baru berengkah bulan tu nyentuk Disember bepalan ba Indu Opis Asadia Kuching di Kota Sentosa.
