PUNCAK BORNEO, 5 Nov: Sitak Parlimen Puncak Boreno ngemataka tiga iku chalun dikenuku bediri minta pilih ba sitak nya.
Pekara nya dikenuku ke Pegawai Pengatur Pengawa Bepilih Besai P.198 Puncak Borneo, Ranum Bari, bepalan ba Opis Pelilih Siburan ke dipilih endur Pengawa Ngantung Nama Chalun serak tu.
Chalun Gabungan Parti Sarawak (GPS), Datuk Willie Mongin, 47, datau ba palan nya pukul 9.09 pagi sereta disempulang Penchadang, Datuk Dr Jerip Susil sereta Penyukung Datuk Roland Sagah Wee Inn.
Datuk Willie Mongin iya nya penyandang parlimen Puncak Borneo ti kala bediri minta pilih ngena tikit Parti Keadilan Rakyat (PKR).
Taja pia kena bulan Ogos 2022, iya sah masuk Parti Pesaka Bumiputera Bersatu (PBB), ke mega parti komponen GPS.
Nangkan ke nya, chalun Parti Sarawak Bersatu (PSB), Iana Akam, 47, datai ba palan nya urung pukul  8 pagi begulai enggau Warrick Mandes (Penchadang) enggau Thomas Ango (Penyukung).
Ungkup chalun Parti Pakatan Harapan, Diog Dios, 55, datai ba Opis Pelilih Siburan begulai enggau Penchadang Michael Konoi enggau Penyukung Chang Hon Hiung urung pukul 9 pagi.
Nitihka penerang, Parti Aspirasi enda nyadi nganjung chalun lalu ngemataka sitak Puncak Borneo semina diperebutka tiga iku chalun ungkup Pengawa Bepilih Besai ke-15 ti deka diatur kena 19 November tu ila.
Puncak Borneo iya nya entara sitak ‘angat’ ungkup PRU serak tu laban ngerikodka penyampau pengundi ke chukup mayuh iya nya  79, 969 naka Ogos 2022.
Sitak parlimen nya ngundan tiga sitak Kunsil Nengeri (DUN) iya nya ; DUN Serembu, DUN Mambong enggau DUN Tarat. -TVS
