KAPIT, 5 Nov: Dato Sri Alexander Nanta Linggi deka disatup dua iku agi chalun ngerebut kerusi Parlimen Kapit ungkup Pengawa Bepilih Besai Ke-15 (PRU-15).
Nanta ke mega penyandang Parlimen nya deka besatup enggau Pangkas Ungga ari Parti Keadlian Rakyat (PKR) enggau Robert Saweng ari Parti Bansa Dayak Sarawak (PBDS).
Nanta disempulang 600 iku penyukung Gabungan Parti Sarawak (GPS) ngulu Palan Ngantung Nama Chalun di Kompleks Kerajaan Negeri Jalan Bleteh, Kapit.
Nanta dipeda tumu datai ngagai palan nya urung pukul 7.18 pagi sereta nyadi chalun keterubah  nganjung pom chalun urung pukul 9.07 pagi.
Bepelasarka rikod, Nanta udah nyadi Kaban Parlimen Kapit kenyau ari taun 1999 sereta menang ba Pengawa Bepilih Besai ke-14 enggau majoriti 10,479 undi.
Ungkup PRU-15 tu, penyampau semua pengundi ke udah berejister ungkup P.215 Kapit iya nya 44,977 iku. -TVS
