BETONG , 5 Nov : Chalun mua baru GPS ba sitak Parlimen Betong iya nya siku orang ti tebangkar dalam bidang politik. Pia ku Kaban Parlimen Betong ke lama, Datuk Robert Lawson Chuat.
Ku iya Dr Richard kala megai pangku pengawa nyadi Sekretari Politik ba renggat Perintah Besai lalu diatu agi nyadi Sekretari Politik Premier Sarawak, Datuk Patinggi Tan Sri Abang Johari Tun Openg.
“Chalun ke baru ari GPS Dr Richard Rapu iya nya siku orang ti mayuh peneleba dalam bidang politik laban iya ke mega Sekretari Politik Menteri Besai lebuh Datuk Amar Douglas Uggah Embas megai portfolio nyadi Menteri di Kuala Lumpur suba lalu diatu iya agi megai pangku pengawa nyadi sekretari Politik ngagai Premier Sarawak”, ku iya.
Nangkan ke nya Dr Richard mega siku orang ke engkeman sereta patut dichalunka GPS ba Pengawa Bepilih Besai Ke-15 tu.
Datuk Robert Lawson ke mega Kaban Parlimen Betong ke lama mutuska diri enda betanding ba Pengawa Bepilih Besai Ke-15 tu lalu nyerahka pekara tu ngagai tuai raban parti ke alai Dr Richard Rapu dichalunka ba sitak Parlimen nya dikena nganti iya.
Berindik ari nya iya madahka Dr Richard siku orang ti patut lalu deka mantu sereta nyukung dalam pengawa kimpin ti diatur sepanjai Pengawa Bepilih Bsai Ke-15 tu.
ENDS
