KANOWIT, 5 Nov: Urung 10,000 iku pengundi baru ti nyerangkung nembiak beumur 18 nyentuk 21 taun entara sida ti deka nyadi pengundi di sitak parlimen Kanowit ungkup PRU-15 tu.
Chalun Gabungan Parti Sarawak (GPS), Datuk Aaron Ago Dagang madah, atur rejister pengundi automatik ngujungka mayuh nama sida ke nembiak udah dipasuk nyadi pengundi.
“Enti suba bedau ngerejister diri enda ulih nyadi pengundi. Tang, diatu automatik,” ku iya maya dirandau pengarang berita TVS pengudah tembu pengawa ngantung nama chalun pagi tadi.
Aaron mega madah, iya endang meransang nembiak asal ari Kanowit anang enda pulai ngundi beserimbai enggau PRU-15 tu dikena nentuka sida milih pengari rayat ke ulih dikearap neruska pemansang di sitak nya.
“Nyadi kitai meransang sida nembiak sampal pulai ngundi sekalika sida ke benung nampung pelajar enggau gawa di mengeri bukai,” ku iya.
Beduduk ari nya, iya ke mega kala nyadi Sapit Menteri Pengerai II ba renggat perintah besai, ngarapka semua pengundi di sitak Kanowit ngundi chalun ari GPS nyadi pengari rayat awakka pemansang ulih terus dibai ungkup pemaik enggau pengelantang rayat.
“Enti sema menang ba PRU-15 tu, mayuh langgur pemansang ke deka enggau diperambu dikemansangka di Kanowit baka infrastrakcha ke ngaul jalai, bekal karan, bekal ai, program ti tau nambahka tikas ekonomi sereta ke bukai,” ku Aaron.
Ku iya mega, sekeda ari langgur pemansang nya udah dipasuk ke dalam Ejensi Pemansang Ulu Rajang (URDA) sereta deka dikerembaika agi nengah Ejensi Pemansang Rascom (RASDA). – TVS
