KUCHING, 22 Okt: Pemujur Gabungan Parti Sarawak (GPS) ba Pengawa Bepilih Besai ke-15 (PRU15) beguna dikena nentuka agenda pemansang Sarawak ulih diteruska ungkup pemaik rayat nengeri tu.
Ku Sapit Premier Sarawak, Datuk Amar Douglas Uggah Embas madahka, pemujur nya mega nyaganka sukung rayat Sarawak ngagai GPS.
“Beguna amat ngagai GPS ulih menang ba PRU tu dikena mandangka sukung sida ngagai Sarawak enggau kitai ulih meda kenyau lima taun ke udah, mayuh pemansang udah nyadi di Sarawak. Kitai deka pemansang diteruska, enda tekeruga,”ku iya pengudah bejadika palan peresa baru Corsome lebuh Hari Enam.
Berindik ari nya, iya minta semua rayat meri sukung penuh ngagai GPS ba pengawa bepilih besai tu ila ngambika projek pemansang Sarawak diteruska.
Iya arap bendar ulih menang ba semua kerusi parlimen ti dipetandingka maya ba PRU tu nyengkaum ba menua pesisir.
Ku iya madah, GPS ti betuaika Datuk Patinggi Tan Sri Abang Johari Tun Openg udah mayuh mai pemansang di nengeri Sarawak tu enggau andal pemansang nya ulih diteruska.
