KUCHING, 20 Okt: Petroleum Sarawak Berhad (Petros) nyaran deka numbuhka empat hab gis di Miri, Bintulu, Samalaju enggau Kuching ti dijangka ngaul asil pemeranak puku penyampau RM65 bilion ba dalam timpuh 10 tahun.
Ku Premier Sarawak Datuk Patinggi Tan Sri Abang Johari Tun Openg madah, empat hab gis nya ti bepelasarka model ‘Hub & Spoke’ ngemudahka serata Sarawak ulih ngasaika akses bekal gis enggau kuasa beresi ke chukup.
Iya madahka, empat hab nya ti dilangkar ba dalam Pelan Hala Tuju Gas Sarawak dijangka mantu ngeranchakka agi aktiviti ekonomi dikena nyapai juluk nengeri manggai taun 2030.
“Ba dalam timpuh ke semak, Petros deka bejalaika dua projek di Miri enggau Samalaju ke alai sebagi ari Pelan Hala Tuju Gas Sarawak,” ku iya madah rambau Pengerami Nyambut Anniversari Ke-5 Petros lebuh Hari Tiga.
Beduduk ari nya, iya nerangka ba hab Miri, projek ti keterubah iya nya loji janakuasa 400MW dikena nentuka pengelikun kuasa di utara Sarawak.
Ba hab Samalaju, Petros deka masang paip gis begulai enggau Sarawak Energy Berhad ngaga loji janakuasa ti dipeda chukup beguna ba pengawa ngemansangka Samalaju nyadi zon industri berat.
Kedua-dua projek nya begunaka puku ti diperanak penyampau RM6 bilion.
“Aku pechaya Pelan Hala Tuju Gas Sarawak deka mayuh macham pemansang ke bukai ungkup pemaik rayat Sarawak ke alai nya nyadi pugu aspirasyen kitai ngambika menua bulih asil penatai pemisi ke tinggi sereta maju,” ku iya madah agi.
Entara temuai bukai ke bisi ngulu pengerami nya, Sapit Premier Sarawak Datuk Amar Douglas Uggah Embas enggau Dato Sri Dr Sim Kui Hian, Chairman Petros Tan Sri Hamid Bugo sereta Chairman Petronas Tan Sri Mohd Bakke Salleh. – TVS
