Kuching , 20 Okt : Perintah mereti sida ti beumur 18 taun udah chukup penemu, ngembuan runding sereta ulih meri pemutus dalam milih pengari ba kawasan tauka sitak sida iya.
Pia ku Sapit Premier Sarawak Datuk Amar Douglas Uggah Embas.
Nangkanka nya ku Uggah raban nembiak mega tentu bisi ati, juluk, runding tauka pikir senentang gaya pemansang ti dikedeka sida jemah ila.
“Raban nembiak tentu bisi juluk tauka pekara ti dikedeka sida iya. Milih pengari ti ulih meri pemansang sereta peluang dikena sida mansang dalam pengidup”.
“Milih pengari ke alai ulih meri pengelantang lalu sida tentu bisi runding ni gaya pengidup dalam kandang 5 taun ke deka datai, 10 taun ke deka datai. Bisi pengawa , bisi pendiau, bisi pengidup, lantang tauka tusah lalu pekara tu tentu bisi dalam ati sida iya”, ku iya lebuh ditemu pengarang berita TVS.
Uggah ke mega Sapit Presiden Parti Pesaka Bumiputera Bersatu (PBB) madahka enggau kuasa ti diberi tu sida patut milih pengari ke ulih nulung sida iya sereta ngarika parti ti ditemu ulih meri pemansang ke alai ulih ngemansangka diri.
Kena 10 Oktober 2022 , Menteri Besai madahka Parlimen direrak pengudah dikemendar Yang di-Pertuan Agong dikena meri awak Pengawa Bepilih Besai Ke-15 (PRU15) diatur. – TVS
