TATAU, 7 Okt: Regatta Tatau 2023 diperambu deka diatur ba taun baru.
Menteri ba Opis Premier Sarawak, Datuk John Sikie Tayai madahka, pengawa besedia ngatur program nya berengkah dipejalaika ba pun ari bulan Januari 2023.
“Taun ti kepenudi kitai ngatur Regatta Tatau iya nya taun 2010.
“Nyauka semak 13 taun regatta tu enda diatur, nya kebuah kitai merambu ngatur program tu ba taun baru,” ku iya madah rambau Majlis Pelancaran Pesta Tatau 2022 lebuh Hari Empat.
John nerangka, Pesta Tatau ke diatur nya ulih negutka penyerakup rayat pupu bansa ke mendam di pelilih Tatau.
“Bisi entara kitai nyauka semak tiga taun enda betemu mua enggau pangan diri. Nengah pesta tu kitai ulih betemu, berami, sereta ngelantangka ati lebih agi begulai enggau diri sebilik sereta kaban belayan ke bukai,” ku iya madah.
Nangkan ke nya, John ke mega Kaban Kunsil Nengeri (ADUN) Kakus madahka, pesta nya nyadi pelantar dikena raban pedaja mit nambahka asil penatai pemisi, nyual produk ke digaga diri empu ke tau narit ati mensia mayuh meli barang ti didaja sida baka produk pemakai, kraf jari, gari asal sereta barang bukai ti semina ulih dibeli ba Tatau.
“Bisi 80 bansal alai bejual disediaka ungkup raban pedaja bejual sepemanjai Pesta Tatau 2022 tu diatur.
“Beduduk ari nya, aku meri puji ngagai Komiti Pesta Tatau laban udah mujur ngatur program tu nengah chara ‘Smart Patnership’ ti ngujungka program mit bukai ke diatur bejalai lanchar sereta nerima sambut ke chukup manah ari mensia mayuh,” ku iya madah agi.
Entudika nya, Pegawai Pelilih Tatau Jabang Juntan madahka, Pesta Tatau 2022 ke diatur ba pun ari 1 nyentuk 16 Oktober 2022 entara program ke lama diatur ba nengeri tu iya nya pengelama 17 hari 16 malam.
Mayuh macham program ke bisi diatur ngaul semua komuniti enda ngira bansa enggau renggat umur sekalika nembiak mit, raban nembiak, apai indai, orang lunggar umur sereta nembiak sekula.
Bisi kira-kira 6,000 iku temuai ngulu program bejadika Pesta Tatau 2022 ti dirichahka seni enggau main asal ke dibantaika rayat pupu bansa di Tatau ti nyerangkung Tanda Kipas, Kuntau, Gendang Pampat sereta tikit benasit. – TVS
