KUCHING, 7 Okt: Kain Burie siti ari pesaka asal bansa Iban ke diatu udah mayuh napi transformasyen ba chura tauka motif kelimpah nerima peminta ti tinggi di Sarawak.
Siku pedagang Kraf Tekuyong Burie Kapit, Clement Kanyan Wong madahka, penyelai enggau pengalus motif ke lebih moden majak dikerindu penguna seriris enggau trend kemaya hari tu.
“Sekeda motif ke lama diubah ti ngambi motif tikai, inovasyen motif ari motif Iban enggau Orang Ulu ti udah nerima sambut ke manah ari mensia mayuh sekalika nya Iban, Melayu, China enggu Melanau,” ku iya lebuh dirandau pengarang berita bedau lama ke udah.
Ku Clement, kain burie ke digaga iya ngembuan motif eksklusif kediri empu laban tetiap bansa motif ke diguna bebida.
Ambika chunto ku iya madah, motif naga enggau tedung ba baju burie lelaki ngembuan cherita sereta bisi ensumbar ti nerangka reti nya.
Clement ke asal ari Rumah Jala, Sungai Melinau di Mujong madahka, bepun ari iya ti endang rindu deka nampung asil pengelandik tu ngujungka iya berengkah belajar ngaga kain burie ari umur iya agi bujang.
Berindik ari timbal ti positif ari mensia mayuh, Clement lalu ngatur kelas belajar kain burie di serata Sarawak nyentuk ke Semenanjung Malaysia.
“Belabuh ari 2019 nyentuk ke diatu, semak 800 iku udah diajar aku sepemanjai 34 siri kus ke udah dipejalai ti ngaul komuniti Iban, Cina, Melayu, Melanau enggau ke bukai,” ku iya.
Kelimpah ari nya, pengelandik ngaga kain burie ulih nyungkak penatai pemisi ke tinggi ngujungka kraf tu majak dikerembai nyadi produk dagang.
Ngelansa pasal sejarah, iya madah kain burie tu pesaka asal ari menua Batang Rajang.
Kain burie suah dikena maya bisi pengerami besai baka Hari Gawai, melah pinang, bedara enggau pengerami ke bukai.
