KUCHING, 7 Okt: Perintah Sarawak ti dituaika Premier, Datuk Patinggi Tan Sri Abang Johari Tun Openg deka terus ngemansangka nengeri tu ke ngaul semua rayat pupu bansa, batang pengarap enggau politik.
Iya madahka, semua rayat deka ngasaika pemansang ti dibai perintah sekalika ba mengeri tauka ba menua pesisir seraya nentuka Sarawak ulih nyapai juluk nyadi nengeri ti maju manggai taun 2030.
“Nya entara kebuah aku bejalaika inisiatif Ekonomi Digital dikena ngelengkaska pemansang Sarawak nuju Industri 4.0 sereta enda tinggal ari menua bukai,” ku iya madah nengah teks jaku iya ti dibacha Sapit Premier, Dato Sri Dr Sim Kui Hian beserimbai enggau Majlis Kesyukuran Anjuran Agama-Agama Lain ti diatur ba Eastwood Valley & Country Club Miri lebuh Hari Lima.
Abang Johari nerangka, Sarawak udah mujur mutarka pengekai COVID-19 enggau udah ngambi singkang ke patut dikena ngurangka empas penyakit nya ari sukut ekonomi enggau pengidup rayat.
“Sarawak udah ngungkupka penyampau RM6.7 bilion dikena bejalaika bantu ba baruh Bantu Khas Sarawakku Sayang (BKSS) 1.0 nyentuk 9.0 ti mai tuju dikena ngelempungka tating rayat sereta tau mulaika pemanah ekonomi nengeri,” ku iya madah agi.
Berebak ari nya, iya madahka, perintah Gabungan Parti Sarawak (GPS) mega udah bejalaika mayuh inisiatif bukai dikena ngemansangka ekonomi gadung ti meruan ba nengeri tu.
Abang Johari madahka, dunya diatu udah nemu enggau nyukung pengawa Sarawak ti bebendar deka ngemansangka ekonomi hidrogen besenutuk enggau juluk ba renggat entarabansa ke deka ngurangka empas ubah gaya hari.
“Sarawak bisi jalai nyadi nengeri ke pemadu maju jemah ila laban kitai bisi asil pengeraja asal ke ulih dikena ngemansangka nengeri tu.
“Ambika chunto, menua bukai baka Singapura nadai asil pengeraja asal tang ulih nyadi menua maju, nama kebuah Sarawak enda ulih?
“Menua Korea nadai asil minyak enggau gis, tang ulih nyadi pengeluar industri kimia pemadu besai ba dunya,” ku iya madah agi.
Premier Sarawak nya mega gaga ati laban inisiatif UNIFOR ngerembaika mesej ke manah nengah program nya ke mega ulih negutka kaul rayat ngambika terus beserakup sereta bebasaka pangan diri. – TVS
